E delegacion di Special Olympics Aruba a biaha diaranson atardi pa Hulanda, cu ta e prome stop di e trayecto pa Special Olympics World Games Abu Dhabi 2019.
E atletanan a biaha bisti cu nan pechi y bril di Garage Cordia Aruba. Joylene de Nobrega di e departamento di mercadeo y promocion di Garage Cordia Aruba tabata presente pa desea cada un atleta exito durante e weganan olimpico special na Abu Dhabi y a encurasha nan tur pa representa Aruba lo miho posibel.
Desde diahuebs 14 di maart te cu dia 21 di maart ta tuma luga e weganan olimpico mundial na Abu Dhabi. E historia di Special Olympics World Games a cuminsa na aña 1968 pa e weganan di zomer y desde 1977 pa e weganan di winter. Cada dos aña ta tene e competencia mundial aki, organisa pa Special Olympics bou auspicio di International Olimpic Committee.
E aña aki mas di 7500 atleta for di mas di 190 pais lo participa den e 24 disciplinanan di deporte durante e weganan olimpico special na Abu Dhabi. Mester menciona cu for di Aruba a sali ayera un total di 26 atleta special compaña pa un delegacion adicional di 7 persona entre otro e coachnan.
E delegacion completo y nan famia presenta na Aeropuerto a gradici Garage Cordia pa e bunita gesto y tabata ansioso pa cuminsa nan trayecto largo pa Abu Dhabi, unda e atletanan lo representa Aruba den 5 categoria di deporte. Cu un sonrisa grandi riba nan cara y hopi ansioso pa representa Aruba, e atletanan a aborda KLM rumbo pa Abu Dhabi en busca pa bin cu medaya pa nan isla stima.
