Diabierna 19 di april 2024, Aruba Trade and Industry Association (ATIA) a tene su reunion general di miembresia den e sala di conferencia di ATIA. Prome cu e parti oficial, Roly Sint Yago, Presidente di Hunta di The Aruba Fair Trade Authority (AFTA) y Martijn Snoep, miembro di hunta di AFTA, a duna un presentacion interesante riba e tema di “Trabounan y strategia di AFTA” pa 2024 y futuro. Despues di e presentacion e miembronan presente por a haci nan pregunta na e team di AFTA.
Durante e reunion a presenta e resultadonan di 2023 y e enfoke pa 2024 y alabes a eligi e miembronan di e hunta di directiva pa aña 2024 – 2025.
Enfoke y resultado 2023
Durante 2023, ATIA su enfoke tawata primordialmente riba cambionan den leynan di impuesto y BBO na frontera. Alabes ATIA a keda participa den varios stakeholders meetings riba e temanan di reforma fiscal, ley laboral, y clima di inversion den nos economia (“red tape”).
Pa e ley laboral por ehempel a tene reunionnan bipartite cu sindicatonan pa por yega na otro riba algun tema importante. Ainda ATIA ta en espera pa e tema aki yega parlamento pa por wordo presenta, discuti y tambe aproba. Directiva a indica cu a traha hopi riba e relacion cu stakeholder y departamentonan concerni cu ta importante y positivo pa e miembresia di ATIA. Ta door di e relacionnan aki a bin cu e idea pa haci un Town Hall cu Departamento di Impuesto (DIMP) y Aduana tocante e BBO na frontera y asina crea un “help desk” na DIMP pa cu pregunta tocante BBO na Frontera.
Tambe ATIA a sigui enfoca durante e aña riba desaroyo di e habilidadnan y experticio di su miembronan y nan empleadonan por medio di diferente workshops, sesionnan di informacion y eventonan pa engrandece e netwerk di miembronan di ATIA. Workshops y cursonan exitoso tawata “Continued Financial Excellence Program”, “Declarant Douane” y “Abolishment of the self-administered pension”. No por a lubida e tan gusta y sold-out Business Mixers, pero tambe ATIA su Corporate Event anual tema “Now is the Future” cu a atrae mas cu 350 bishitante.
Enfoke pa 2024 y futuro
Pa aña 2024 y 2025, ATIA lo enfoca mas riba e tema laboral specialmente awo cu tin un escasez riba e mercado laboral. Tambe e presion extra cu esaki ta presentando cu tur e proyecto nobo cu ta habriendo den 2024.
Otro temanan cu ATIA lo keda enfoca riba dje ta reduccion di “Red Tape”, incentiva pa inversionista local y internacional, y tambe pa den futuro Aruba transicional pa un BTW. ATIA hunto cu su expertonan tambe ta haciendo diferente estudio riba temanan cu a keda nombra den e reunion, pero lo keda pa awo solamente pa e miembronan di ATIA.
Hunta di Directiva 2024-2025
Pa aña 2024 – 2025, e hunta di directiva a dispidi di 2 miembro cu a forma parti di e hunta pa hopi aña, esta Frank Snijders, cu a guia ATIA como Presidente e ultimo 4 añanan, y Matthijs Bijen, representando “WAB” cu ta e gremio di compania di construccion. ATIA ta gradici Frank y Matthijs pa tur nan añanan di aporte valioso como Presidente y miembro di hunta di ATIA. Lo bay eligi e presidente, vice-presidente, tesorero y secretaria nobo durante e prome reunion di e hunta y ATIA lo anuncia e resultado despues.
E hunta di directiva di ATIA pa 2024 – 2025 ta consisti di: Gina Habibe, Enrique “Tito” de Cuba, Andrew Harms, Tisa LaSorte, Roland Croes, Danilo Werleman, y Jenniffer Figaroa-Guzman. ATIA ta contento pa anuncia su 2 miembronan nobo nan cu ta Rachel Maduro y Fred Steeghs.
E reunion a culmina cu un networking event pa e miembronan presente na ATIA su “Bao Palo Terrace”.
ATIA
Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org of nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association
