E rumannan Jansen a biaha siman pasa pa Puerto Rico pa participa na un campamento di desaroyo unda e paisnan den nos region a participa. Durante un siman largo nan a train mainta y atardi. Durante e campamento nan a haci test di entre otro natacion, ciclismo y coremento na pia. Mester bisa cu e rumannan Jansen a haci nan testnan cu hopi bon resultado.
Diasabra mainta e rumannan Jansen ta forma team cu Costa Rica pa por participa na un careda di Mixed Relay, aki ta caminda e rumannan Jansen ta logra subi podium y yega na di dos luga, despues di Team Colombia.
Diadomingo madruga a busca e atletanan pa competi na e careda 2024 World Triathlon Development Regional Cup Puerto Rico. E atletanan a haci un Sprint Triathlon unda nan mester a landa 750 m, bike 20 km y core 5 km na pia. Rebecca Jansen a cuminsa, el a sali na di cuater luga for di awa pero a domina riba bais y a logra drenta prome den transicion. Rebecca a lidera e careda na pia te na ultimo buelta unda e atleta Costa Rica a pasa su dilanti. Rebecca a completa su Sprint Triathlon den 01:09:33 y ta yega di dos luga den categoria Elite y ta logra un medaya di oro den categoria Junior.
E siguiente pa cuminsa ta su ruman Christiaan Jansen, el a sali di tres luga for di awa y a lidera e parti di ciclismo hunto atleta elite di Panama, e atletanan a traha hunto y ta habri un gap riba e resto di atletanan. Christiaan ta logra termina su careda den un tremendo tempo di 58:57 algun seconde patras di atleta elite di Panama. Christiaan tambe ta logra un medaya di oro den e categoria Junior.
Rebecca y Christiaan ta gradici Aruba Triathlon Association pa e oportunidad bunita aki. Di curason ta gradici tur persona cu a yuda den e desaroyo di e rumannan Jansen. E siguiente compromiso internacional ta Americas Triathlon Cup and Central America and Caribbean Championships na Punta Cana cu lo tuma luga fin di juni.
