Amor ta un fuente di motivacion y forsa. E ta reforma e mal caracter, mehora un su balor propio y autoestima, y ta construi confiansa mey-mey di hende. Amor tambe ta crea un ambiente sano pa traha, bida hunto y ta fortifica lasonan di famia.
Awor cu abo sa e importancia di amor den nos bida, nunca entrega riba dje. Awe ta Dia Internacional di amor, un fecha declara mundialmente riba 14 di februari. Awe tur persona kier ricibi y duna amor. Aunke cu ayera hopi a lubida riba dje y mañan hopi lo bolbe lubida riba dje. P’esey awe mi kier a hiba cada un di nos na e principio di humanidad.
Cada un di nos tin un principio unda cu nos a wordo forma den bariga di nos mama. Unda cu nos mayornan sea a namora of no a uni hunto den relacion sexual y produccion di un ser humano a cuminsa. Ora cu nos tawata den bariga di nos mama a trece alegria na hopi. Un ser nobo den e famia. Ya caba hopi a sinti amor pa un baby cu ainda ningun a conoce. Tin cu ta haya cu 9 luna ta hopi pa warda. Te ora cu e dia a yega di e nacemento di e ser sea cu e ta mucha homber of mucha muhe.
Un baby tur hende ta stima. Pero hopi a lubida cu nos mester stima pa bida largo. Ser ey den tur etapa di su bida. Amor ta un sentimento pa bida largo. Den bida nos lo bin conoce tur clase di persona cu nos lo stima den diferente forma. Un yiu y su mayornan mester stima otro igual cu e mesun amor. Amor di famia ta un otro amor cu nos mester stima otro manera famia.
Bo tin amor di Amistad tambe ta un amor special cu nos ta sinti pa otro unda cu amistadnan mester stima otro igual. Despues tin amor di pareha unda cu dos persona ta bira un den amor pa mantene e amor ey bibo pa semper pasobra lo toca nan pa experencia e principio di amor unda cu den nan relacion lo nace un baby cu lo forma un famia den cas. Asina amor mester ta den tur cas, den bida di tur persona cu lo bay conoce amistad y pareha.
Asina Dios a crea e mundo pa e sigui lora y amor so por mantene e mundo hunto y sano. Pero hopi situacionnan a bin y a kibra tur cos. Mayornan a separa, yiunan a experiencia famia kibra, amistad ta kibra, pareha ta kibra, amor entre cada un di nan a caba y termina na pleito.
Kico a haci falta pa mantene amor mey-mey di hende. Loke tawata falta ta e amor humano. Si e amor humano no t’ey no tin nada pa wanta hende na otro. Dios a crea cada ser humano cu amor y deseo di Dios ta pa cada ser humano stima otro cu amor. Laga nos busca den e profundidad di nos alma pa bay y busca bek e amor humano cu ta biba eyden pa asina nos alma por pasa e amor ey pa nos spirito y nos spirito por deposite den nos curason.
Si nos alma, spirito y curason ta den un solo union nos por stima nos prohimo manera cu nos ta stima nos mes. Fruta lo nace den nos curpa. Nos curpa ta igual cu tur mata cu ta duna fruta cu ta beneficioso pa e salud humano.
Nos frutanan ta special cu tambe ta carga beneficionan pa e humanidad. Laga nos carga e diesdos frutanan di amor cu ta caridad, goso, pas, pasenshi, gentilesa, cariño, bondad, fieldad, generosidad, modestidad, control propio y castidad (significa puresa sexual). Tur esaki ta regaldonan duna na e ser humano pa por pas’e pa otro y pa recorda otro riba nan.
Laga nos ta humilde cu otro, laga nos ta un miho ser humano cu otro. Laga nos para semper pa bon, lucha semper pa e derecho humano cu cada persona tin y respeta cada persona pa su rasa, sexualidad, creencia, color di cuero, edad, nacionalidad, condicion fisico, genero y color politico.
Laga nos para semper contra tur maldad. Laga nos ta personanan husto y kere den husticia y den berdad. Laga amor prevalece den nos bida. Un feliz dia di amor pa cada persona y no lubida cu amor humano ta bin prome cu tur cos. P’esey e amor humano ta asina importante den bida.
