Diaranson ta dia di tur curason. Pero e aña aki tambe, Dia di San Balentin (Valentine’s Day/Dia de San Valentino) a cay precisamente tambe riba un diaranson.
Nos di 24ora.com/TREMPAN a dal un keiro di nos isla, pa papia cu e pueblo, pa puntra con nan ta wak e Dia di San Balentin.
E hende muhe ta di opinion cu e hende homber ta un ser humano. Nos tur ta special y e hende homber ta forma parti di e bida di e hende muhe, sea como casa, como ruman, como un compañe di scol. Nos tur merece un detaye bunita.
Un cabayero a indica cu semper mester trata e hende muhe di manera special y no solamente riba e Dia di San Balentin. Duna e ser femenino cariño, lag’e sinti cu e ta special.
Semper ora ta trata di Valentine’s Day, un hende muhe kier p’e homber ta detayista cu ne. Pero bo ta haya e hende muhe cu tambe kier ta detayista cu e persona cu e ta stima, trat’e bon, dun’e cariño.
Kico un hende muhe gusta riba e dia di awe? Un cena romantico, bay sinta cant’i lama, wak e olanan bebiendo un glas di biña.. Algo romantico… Cos cu no sa pasa tur dia.
Ta importante p’e hende muhe, pero sigur e hende homber tambe pa e sinti e stimacion di su pareha. No ta paso cu a pasa tanto tempo, mester stop di expresa e amor y stimacion. Esey mester t’ey pa semper!
Ta spera cu awe tur hende muhe y tur hende homber a pasa un dushi Dia di San Balentin. Trata bo pareha cu tur e amor, respet y cariño manera e prome dia.
Na esunnan cu no tin pareha, pero nan tin un amistad, tambe cultiva e amistad ey. Un amistad ta mescos c’un flor, cu sin atencion, e ta marchita.
