Den cuadro di e declaracion di Minister Rocco Tjon den parlamento relaciona cu e relacion entre Vereniging Rijscholen Aruba (VRA) y Cuerpo Policial Aruba. Thomas Ruiz ta secretario di e asociacion, parce cu Tjon a comenta den parlamento cu debi na e kiebro di relacion entre VRA y KPA, Tjon a hay’e ta lanta un otro comision pa regla e parti organisatorio di e departamento di rijbewijs di KPA, esta Bureau Examen Rijbewijs (BER).
VRA a lanta na 2019 cu meta pa uni tur ‘rijschool’ na Aruba bou un solo organisacion y pa salvaguardia e derechonan di nan miembro y cliente. Na final e meta ta pa; drecha e sistema di rijbewijs na Aruba.
Bou maneho di mr. Andin Bikker VRA a duna varios conseho e tempo ey riba e maneho di rijbewijs. Tambe a duna varios conseho con pa mehora asuntonan den e departamento menciona. Na banda di duna conseho, semper a vocifera nan preocupacionnan tambe. E tempo ey Rocco Tjon tabata parlamentario. E tabata na altura di tur conseho y hasta tabata apoya nan. Desde cu el a bira minister, tur cos a cambia. A mira un persona completamente diferente.
VRA ta aclaria cu e no tin problema cu Cuerpo Policial, ta mas bien un conflicto entre e chef na BER, pa cual Tjon ta na altura pero ta opta pa bruha storia y haci comosifuera cu VRA tin problema cu henter e cuerpo. E dicho chef tabata na altura di varios cos cu a bay robes pero ningun dia Bikker ni Tjon a atende cu ne.
