E siman aki, Minister Charles Cooper a ricibi Secretario di Estado, Alexandra Van Huffelen na Servicio Meteorologico Corsou. E meta di e bishita aki tabata pa mustra Van Huffelen e desaroyonan cu Corsou ta haciendo riba e tereno di cambio di kima.
Na Corsou, nos a cuminsa atende cu e trayecto di clima for di 2015 cu Corsou su participacion na e delegacion di Reino Hulandes na COP. For di tempo ey, Corsou ta trahando pa subi e resistencia contra e crisis di clima.
Corsou tabata tin diferente adelanto concreto. Nos a traha riba diferente tema y recien a lanta e structura gubernamental, den forma di e Plataforma di Cambio di Clima, pa por atende miho cu e aspecto di clima y pa por monitoria pero tambe stimula participacion den esaki.
Pa loke ta cierto topico, tin diferente plan traha caba. Por menciona maneho di energia, firmamento di e MOU Zero Emission Medium and Heavy Duty vehicles y maneho di awa cu pronto conseho di minister lo trata.
Corsou ta prepara su mes tambe pa e fase di implementacion. Den mundo ta mira Corsou como un pais rico, mirando cu nos ta parti di Reino Hulandes. Pa e motibo aki, nos no ta bini na remarca pa financiamento riba e tereno di clima for di diferente fondonan internacional.
Pa e motibo aki, nos mester ta creativo. Nos ta cera aliansa cu e otro paisnan pa por ricibi yudansa. Tambe nos ta comparti nos conocemento cu diferente forma pa por desaroya conocemento. Pero esaki so no ta suficiente.
E mundo internacional ta mustra nos bek na Hulanda como pais cu por financia Corsou, y nos mester yega na discuti e topico aki tambe. Minister Charles Cooper ta spera cu a traves di e combersacion, hunto cu e miembronan di e Plataforma di Cambio di Clima Corsou, lo yuda pa crea consciencia y pone e rekisitonan na luga pa por sigui discuti riba e topico aki.
