Miembro di Eerste Kamer pa fraccion di Partij van de Arbeid (PvdA), Jeroen Recourt a comparti cu 24ora.com su impresion riba loke ta e conferencia di InterExpo 2022 tumando luga na Den Haag, Hulanda e siman aki. E parlamentario Hulandes a keda impresiona pa e contenido di e discusion y a admiti cu tin un deficit democratico den reino, pero no ta convenci cu representacion di e islanan den Tweeda Kamer lo soluciona esey por completo.
Un di e aspectonan cu mas a hala su atencion riba e di dos dia tabata e testimonio di dos representante di Caribe Hulandes tocante colonialismo y independencia, ademas di esunnan cu no ta calific’e como colonialismo y ta forma parti di reino pa boluntad propio. E otro cu a resalta cerca e parlamentario ta e desigualdad den enseñansa y e consecuencia cu esaki por tin pa cada pais den futuro.
Mas aleu, e parlamentario Hulandes ta kere cu atencion pa cu e deficit democratico ta na su luga, sinembargo no ta convenci cu un door di duna e islanan di Caribe Hulandes un luga den Tweede Kamer, lo ta e solucion ya cu e ta mas compleho cu representacion. Cu esaki ta referi na e desigualdad structural den diferente area manera economia y enseñansa. Ta debate cu ta necesario y e ta kere cu e politico Hulandes mester cuminsa ta mas sincero cu nan mes den esaki.
