Ora cu tur hende a pensa cu despues di 3 luna pega na Venezuela, deteni, sin acceso na cuminda y bebida, cu mañan porfin e trio Arubiano lo regresa Aruba…awor ta resulta cu esey ainda lo no sosode. Parce cu Gobierno Venezolano no a duna aprobacion pa e tres Arubianonan specifico aki, deteni na un base militar, pa nan por sali for di Aruba. Cuanto tempo mas nan lo mester keda Venezuela, ainda no ta conoci.
Ta for di dia 3 di maart ultimo cu e tres amigonan cu a sali for di Savaneta pa bay busca Pau Martijn na Venezuela, ta deteni na Venezuela. Nan a sali pa Colombia pero pa kibocacion a drenta na un boca robes y a resulta cu tabata Venezuela, pa cual Guardia Nacional tin nan wanta na un base militar pendiente aprobacion pa nan por sali pa Aruba.
Edwin Duijneveld, consehero huridico di e famia a confirma na 24ora.com awe mainta cu e tres Arubianonan no ta regresa mañan riba e vuelo cu a logra organisa for di Caracas pa Aruba. Ta trata aki di e hombernan Reangelo Stamper di 32 aña di edad, casa na Aruba y tin un yiu na Hulanda. E tin piscamento como su pasion. Tambe Franklin Vos di 49 aña di edad y Robert Laveist, un bon amigo di nan, casi ruman.
Locual a pasa, segun Edwin Duijneveld, ta cu e trio no ta encarcela. Solamente cu ta warda pa habri frontera pa nan por sali for di e base militar y bula bin Aruba. Como cu no tin vuelo, a opta pa wanta nan den e base militar. Pero, no ta duna nan nada eyden, pa cual for di Aruba mester manda placa pa nan come, bebe, bisti y pa cumpra carchi di celular pa tin comunicacion.
Pero si ta wardando frontera habri y mañan tin vuelo, pakico nan no por bula anto? “A presenta un circunstancia nobo”, asina Edwin Duijneveld a confirma na nos. A resulta cu tin hende contagia cu Coronavirus na e base militar y consecuentemente, tur hende trahando of kedando eyden awor ta den cuarentena. Gobierno Venezolano bou ningun circunstancia ta dunando aprobacion pa e Arubianonan sali awor, siendo nan ta den cuarentena na Venezuela.
Ta un asunto masha lamentabel mes pasobra nan tin lunanan sperando un vuelo asina, pa porfin nan por regresa nan cas cerca nan famia. Awo cu porfin, despues di varios intento, cu Gobierno di Venezuela ta duna aprobacion pa saca un vuelo for di Caracas pa Aruba, cu awor net nan tres no ta haya “OK” pa subi e avion y regresa nan isla stima.
Mañan e vuelo lo sali for di Caracas cu 40 pasahero Arubiano pega na Venezuela den diferente ciudad. Rino Hermans, Director di Bureau Rampenbestrijding Aruba (BRA) a confirma cu e pasaheronan mes mester a busca un forma pa yega Caracas y e vuelo no ta cubri pa Gobierno di Aruba tampoco, sino cada pasahero individual mester a pasa nan pasashi pa bula pa Aruba. Como tal e no ta un vuelo humanitario sino un vuelo comercial, pero cu aprobacion di Gobiernonan di Venezuela y di Aruba pa e por repatria Arubianonan cu a keda pega na nos pais bisiña durante e periodo aki di Coronavirus.
