Awe Corte di Prome Instancia a condena Rudolf Tulio “Ruru” Wever pa a comete actonan di inmoralidad cu dos mucha muhe menor di edad, kendenan ta familiar. Y e castigo di Hues ta di 30 luna di prizon, pero 10 luna ta condicional y cu 3 aña di prueba. Consecuentemente e lo mester sinta 20 luna y ainda kitando un tercera parti si e tin un bon conducta durante su castigo den KIA.
Tratamento di e caso a tuma luga tres siman pasa y Ministerio Publico a acus’e di a mishi cu e dos menor di 12 aña (un tabatin ocho aña e tempo ey) entre e periodo di januari 2018 y mei 2019. E homber a nenga di a mishi cu e muchanan cu tabata keda na su cas ora cu e mayornan bay traha. Unicamente el a admiti di a dal nan cantiman pasobra nan ta haci fastioso.
Pero docentenan na scol a mira cambio di actitud den e menornan, nan caracter a cambia y a cuminsa papia cu nan. Pocopoco e informenan a cuminsa sali. Y e mama a dicidi di haci denuncia.
Hues a bisa cu e ta kere palabra di e muchanan, ya cu nan a conta tur loke a pasa, den idioma di muchanan di nan edad y loke nan a declara ta cuadra cu otro. Un di nan a conta con el a mira e omo abusa di su ruman muhe chikito di 8 aña. Di otro banda, e cambio di caracter ta caracteristico di muchanan abusa.
Hues a bisa e acusado, kende a scucha e sentencia via di video-call, cu e acto aki ta laga e menornan traumatisa pa resto di nan bida. A tene cuenta cu psicologo a bisa cu e chens pa e ripiti e delito aki ta hopi grandi.
A base di esaki Corte a bay di acuerdo cu e demanda di fiscal, cu ta 30 luna kitando e 10 luna condicional y 3 aña di prueba. Esaki ta nifica cu pa otro luna caba e lo ta den libertad bek. E acusado ta encarcela desde luna di mei di 2019 y cu e castigo impone, e lo mester sinta mas o menos 14 luna den prizon.
