Awetardi pa mas o menos 6:30pm, famia di Reangelo Stamper a haya yamada di Venezuela, informando cu desde awe tardi nan ta cera na Venezuela. Guardia Nacional di Venezuela a detene nan y a coy nan boto “Rosalia”, un piñero di 30 pia, den beslag. Famia no ta sigur si nan tin abogado pero via canalnan diplomatico for di Aruba ta purbando pa libera nan bek. Parce cu husticia Venezolano ta acusa nan di a drenta Venezuela di forma ilegal.
Un rato pasa 24ora.com a bishita e famia na Mabon pa splica nos di e buelta nobo aki den henter e accion di buskeda cu a start awe mainta ora e tres amigonan a sali rumbo pa Colombia pa busca paradero di nan amigo Paulus Martijn. A menciona cu lo a haya indicacion cu e “satelite phone” ta activo na costa Colombiano. Ta riba e tip aki nan a dicidi di sali awe mainta, segun famia a conta nos awor ey. Pero te cu atardi no a haya comunicacion mas cu nan.
Awo ta resulta cu nan nunca no a yega Colombia. Nan a bay rumbo pa Castilletes, unda supuestamente lo a a localisa Pau Martijn awe mainta. Pero e trio lo a tuma e ruta via Venezuela. Famia na Aruba no sa si a detene nan na tera of riba lama. Nan a confirma na nan cu nan no tin abogado, pero awo ta canando e ruta diplomatico pa logra saca nan liber. Parce cu e trio di Aruba lo tabatin un carta di Gobierno di Aruba den nan poder den cual ta pidi cooperacion di autoridadnan pasobra Rosalia ta riba un mision di “Search & Rescue”.
E trio cu awo ta cera na Venezuela ta:
- Reangelo Stamper, di 32 aña, casa na Aruba y tin un yiu na Hulanda. Piscamento ta su pasion.
- Franklin Vos di 49 aña di edad
- Robert Laveist, un bon amigo di nan, casi ruman.
Ta canalisando tur informacion via Departamento di Relacionnan Exterior di Gobierno di Aruba, pa di nan banda via Embahada di Reino Hulandes na Caracas, purba intermedia pa libera e tres hombernan aki. Nan famia a aclaria cu nan no a yama e famia di Pau pa bisa cu nan lo a haya Pau pasobra nan no a ni yega na e sitio debi cu Guardia Nacional a detene nan. Nan ta lamenta cu a bay haci algo pa “bon” y awo a sali nan di “malo”.
