“Actualmente mi ta ricibiendo yen critica. Critica constructivo semper ta bon, mi por siña di dje y mehora. Pero actualmente tin hopi hende ta djis critica cos sin pia y sin cabes. Rebahando mi manera mi no a bay scol. Manera mi no ta sirbi. Mi ta un hende cu no gusta inhusticia”, asina Josephine Albertus, Presidente di SIMAR, a skibri riba su pagina di Facebook. Esaki ta un reaccion riba e ultimo atakenan di coordinadornan di Gobierno, scondi tras di “Fake Accounts” riba Facebook ta ataca e sindicalista.
Na aña 2004 el a caba di studia como “Medisch Bioloog” na Hogeschool Rotterdam, na Hulanda. Despues el a traha 2 aña den e departamento di Pathologie na Aruba. Durante e 2 añanan ey el a studia Hoger Management na Aruba. Dos aña despues, esta na 2006, el a regresa Hulanda pa studia “Microbiologie” na VU Amsterdam. Despues di esaki el a studia 2de graads scheikunde na Amsterdam.
Josephine Albertus a duna les pa 10 aña largo na Hulanda den e materianan:
- Natuurkunde
- Scheikunde
- Wiskunde
- Biologie
- Verzorging
Durante e 10 añanan ey el a sigui diferente curso:
- Werkmeester
- E buddy
- Orde in de klas (klassenmanagement)
- Coach
- EHBO
- EHBO instructeur
- Lotus
Na aña 2016 el a caba di studia como “Coach in het Onderwijs” of tambe conoci como “Leermeester”. Na aña 2017 el a regresa Aruba y a cuminsa duna les na EPB Hato. Desde e momento ey te awo el a sigui EHBO cursus, te cu el a logra su EHBO diploma, pa despues logra caba tambe como “EHBO instructeur diploma” di Rode Kruis. Josephine Albertus a logra caba e curso di VCA cu exito y hasta e curso di VCA Management. Comosifuera poco, el a studia pa bira un EMT y consecuentemente awor ta un instructor di EMT.
E ta masha orguyoso di su mes y di tur locual el a logra te awo. Specialmente pasobra su casa y nan 4 yiunan a dun’e e espacio pa e por a sigui studia, no obstante cu e mes ta duna les tur dia.
Pa locual ta trata su rol awendia como sindicalista y Presidente di SIMAR, el a duna di conoce cu “Tanten cu e veld di enseñansa kier mi representa nan, mi lo haci esaki. Mi no lo laga ningun di e criticanan actual sin pia y sin cabes kibra mi”, asina Josephine Albertus a termina bisando.