Maritza Maduro ta un Arubiano cu tin 8 aña y dos luna cera den prizon na Guayaquil, Ecuador pa motibo di transporte di droga y ainda e falta pa sinta. El a wordo sentencia na 12 aña di castigo. 24ora.com tabata tin e exclusivo di a papia cu Maritza, kende a conta nos di su banda kico ta nifica pa ta cera den un prizon den exterior.
E ta conta nos cu ta hopi duro pasobra e ta su so, no tin ningun famia ni ningun hende pa bin bishit’e.
Un cos si, el a comenta, e consul Hulandes ta bin wak’e cada tres luna y nan ta dun’e 90 dollar, esta 30 dollar pa cada luna pa e por come eyden. El a pidi nan pa nan por mand’e KIA na Aruba. Sinembargo nan a bis’e cu esey tin cu pidi Aruba pa por yuda den e caso aki.
Maritza ta den duda como tambe e consul, cu Aruba por acepta. E ta pidi ayudo, wak si Aruba por dun’e un man.
Awor aki mes e ta un diabetico y ya nan a amputa un dede di dje. E pia ta sigui malo, segun Maritza. E ta pidi porfabor, si por yud’e y kisiera mand’e KIA pa e por bay pasa e resto di su castigo eynan.
Toch tin su banda positivo
Aunke e ta cera na Ecuador, el a siña hopi. El a haya un educacion, tambe nan ta siñ’e obra di man. Tambe ta traha renchi di dede, renchi orea, hopi cos di kraaltjes. Ta siña cose tambe. Fuera di esey ta siña makiyahe. Toch di su experiencia no positivo, tin algo cu si tabata bon y cu el a siña di dje. Esey ta pa capta cu e sistema di e luga.
No ta facil
No ta nada facil cera eyden, el a remarca. Tin discriminacion y principalmente si bo ta stranhero, ta pio, segun Maritza. P’esey mes e ta pidi pa autoridadnan na Aruba pa dun’e un man pa asina e haya traslado for e prizon caminda cu e ta cera na Ecuador, pa KIA na Aruba.
