Ya pa varios siman, e seleccion di Aruba den e deporte di equitacion ta den pleno preparacion pa e Mundial di Equitacion cu lo ta dentro di algun siman celebra na Ocala, Florida e dianan 19 pa 21 di juli proximo. E guia principal di e seleccion, Jorge Romero di Puerto Rico tabata na Aruba pa asina duna su ultimo observacion y hasi e ultimo ahustacion na e jinete y amazona prome cu nan sali pa representa Aruba den dicho mundial. Mester bisa cu e seleccion di Aruba ta uno grandi unda un total di 12 jinete y amazona lo competi den 6 diferente categorianan.
E atletanan cu lo forma parti di e seleccion di Aruba ta Genesis Pietersz, Gabriella Piazzi, Elizabeth Johnson, Melanie Wever, Zoey Arends, Noelani Figaroa, Eva Pols, Natalia Mouawad, Alina Mansur, Gianluca Curiel, Willem Werleman y Jordy Wever. Tur nos atletanan tin un nivel haltisimo di preparacion y ya a logra titulonan grandi den exterior. Nos atletanan lo meter midi forza contra jinete y amazona di Colombia, Corsow, Venezuela, Panama, Puerto Rico, USA, Ecuador y Republica Dominicana. E ekipo tabata den entrenamento intensivo cu e Head Coach como tambe nan propio coachnan local.
Danki na donacion di Lotto, e Loteria di Aruba, Stichting Sportsubsidie Aruba a yuda subsidia e biahe di e delegacion di equitacion pa e mundial na Ocala, Florida, Merca. Cumprando weganan di Lotto, e Loteria di Aruba bo ta contribui na deporte riba nos isla. Meta di St. Fundacion Lotto pa Deporte ta pa organisa loteria, cambia bida di su hungadonan y na mes momento inverti den deporte local pa medio di donacionnan na Stichting Sportsubsidie Aruba.
