Diadomingo atardi e ASU Olimpiada 2017 a yega su final den Centro Deportivo Betico Croes. Dilanti invitadonan di honor, atleta y dirigentenan di e federacionnan deportivo participante, Aruba Sport Unie a celebra e clausura di un otro exitoso Asu Olimpiada.
Despues di algun palabra elocuente na tur e atleta y 18 federacionnan deportivo participante na e ASU Olimpiada 2017, a otorga algun merito di honor na algun persona cu a significa hopi pa nos deporte local. Esnan cu a haya e reconocimento como muestra di aprecio ta sra. Marjan Vermeulen, sr. Miguel Tromp y sr. David Ruben Groder. Mester bisa cu lamentablemente sra. Braulio Wester awe den felis memoria a fayece algun dia atras y tabata un momento di tristesa serca tur presente mirando cu kier a honra su persona cu un merecido reconocimento pa tur su anjanan di dedicacion na engrandece e deporte Arubano, specialmente baseball Little League. Tambe a otorga e reconocimento di miembro honorario na sr. Enrique Gomez esaki como muestra di aprecio pa su dedicacion na e deporte Arubano. E di 62 aniversario di ASU Olimpiada sigur tabata un exito rotundo.
E representante maximo di e deporte na Aruba pa 62 anja ta contribuyendo na e formacion di nos mucha y hobennan pa nan bira un bon cuidadano, tur esaki atrabes di deporte. Un danki na Lotto, e loteria di Aruba cu pa medio di St. Sportsubsidie Aruba a subsidia henter e evento di e ASU Olimpiada 2017 organisa pa Aruba Sport Unie. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.
