Diadomingo 26 di november, Aruba Triathlon Association lo organisa nan ultimo actividad pa loke ta e calendario deportivo di aña 2017. E federacion lo organisa un tremendo Off Road Duathlon.
E Off Road Duathlon lo inicia 7or di mainta na Arashi y lo por competi den e categorianan di mucha, junior y adulto, por participa Individual of den Team di Relevo. E distancia cu lo wordo recori ta como lo siguiente mucha te cu 14 aña lo core 2.2 km – bais 7.2 km – core 1.3 km, mientras den Junior/Adulto esaki lo ta core 4.4 km – bais 14.4 km – core 2.6 km. E deporte di triatlon un bes mas a score den e aña deportivo 2017, unda casi tur luna tabata tin un of mas evento di triatlon, aquathlon, duathlon, mientras cu e participacion cada bes a bira mas grandi. Riba tereno internacional nos atletanan di triatlon a sa na haci un bon papel, den tur categoria, principalmente nos atleta elite Renze Postma, Giannon Eights sin lubida Linda Smit, Sandra Postma, Lucien Dirksz y e rumannan Cristian y Rebecca Jansen.
Un palabra di pabien sigur na e federacion di Aruba Triathlon Association cu nan tremendo anja deportivo. Mas cu claro e calendario di 2018 ta cla caba y ta premira cosnan grandi na caminda. Un danki sigur na Lotto, e Loteria di Aruba pa medio di St. Sportsubsidie Aruba cu a subsidia e evento di Off Raod Duathlon organisa pa Aruba Triathlon Association. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.
