E hecho cu banco ta nenga di habri un cuenta coriente pa ex-minister Otmar Oduber, debi cu e ta sospechoso den un caso penal di labamento di placa, no ta un motibo valido. Corte awe a dicta fayo na banda di Aruba Bank y a obliga nan di habri un cuenta di banco p’e comerciante, tanten cu corte no castig’e pa e acusacionnan cu Ministerio Publico tin contra dje awo. Den caso cu banco no cumpli, a impone un dwangsom cu ta core te cu mey miyon florin riba cabes di Aruba Bank.
Hues mr. A van de Leur awe a tuma un decision awe den e caso sumario (kort geding) cu BCY Entertainment VBA y Otmar Oduber, ambos defendi door di abogado mr. Alan Kuster a entama contra Aruba Bank, cu a conta cu defensa di abogado mr. Theresa Croes-Fernandes Pedra.
E caso a cuminsa ora cu na november 2020, Aruba Bank a manda avisa Otmar Oduber cu nan no ta habri un cuenta p’e pa su negoshi nobo Bochincha. E decision ta basa riba noticianan tendencioso saliendo den direccion di e ex-minister cu entretanto ta un sospechoso di husticia, sospecha entre otro di labamento di placa. Ora cu Aruba Bank a tuma e decision drastico di nenga Oduber pa habri un cuenta, no obstante cu e tin mas di 25 aña caba cliente di e banco, cu a purba habri cuenta na otro banda tambe pero tur a neng’e. Probablemente pa e mesun motibo, pa evita un disputa cu Banco Central cu ta supervisa banconan comercial.
Corte a evalua e punto di bista di Aruba Bank y esun di Otmar Oduber cu su negoshi Bochincha y ta di acuerdo cu Oduber tin urgencia pa tuma un decision pa por haci negoshi normal. Hues ta haya cu banconan tin un rol tambe pa hunga den henter e industria di negoshi na Aruba. E rol ta pa por garantisa cu negoshinan por participa na haci comercio local y internacional. Pa por participa na comercio, e negoshi mester tin un cuenta di banco y den esaki, Bochincha como tal no ta un excepcion.
E hecho cu Aruba Bank ta dicidi riba nan mes, basa riba un derecho cu nan ta pretende di tin pa scoge ken nan kier como cliente, ta comprendibel pa hues. Pero, e magistrado ta sinti cu e ora banco mester presenta motibonan suficiente pisa y valido riba cual ta basa nan decision pa no tuma un cliente. Pero pa djis nenga un cliente pa por habri un cuenta coriente, sin cu nan tin tur e motibonan urgente y pisa, ta un hecho contra ley.
Di otro banda, berdad ley ta bisa cu un banco mester conduci un investigacion riguroso riba tur cliente nobo, prome cu haci un cuenta pa nan. Banco Central ta supervisa e banconan tambe si nan ta cumpli cu e ley ey debidamente. Pero hasta aki hues ta nota cu Otmar Oduber a entrega Aruba Bank tur documento cu nan a pidi, pues por papia aki di hopi transparencia. Y for di e documentonan ey banco no a haya ningun motibo pa no tuma Bochincha como cliente.
E hecho cu Otmar Oduber ta un sospechoso di husticia tampoco ta motibo pa no habri un cuente di banco pe. Hues ta sinti cu e ta inocente ainda, te ora cu un hues penal dicidi otro y castig’e. Durante tratamento di e caso Otmar Oduber a sigura cu e no tin nada di haber cu tur locual Fiscal ta acus’e di dje den e caso, pero cu e no a haya un chens pa defende su mes ainda dilanti corte. Como ex-politico e ta hopi biaha blanco di critica di opositornan, pero cu esey no por strob’e di por biba riba e isla aki y haci negoshi cu e mesun derecho cu otronan.
Hues a splica cu durante tratamento di e caso, Aruba Bank a menciona di tin un lista di motibonan dicon no kier haci negoshi cu Otmar Oduber pero no por a presenta nada concreto, por lo menos, nada cu Corte ta haya di suficiente peso pa para na banda di e banco den esaki. E hecho cu, door cu Bochincha mes no tabatin cuenta na banco y tabata uza otro cuentanan di otro hende pa deposita nan placa, no ta un punto cu e banco por a sostene den e bataya legal. Hues a haya cu Otmar Oduber tin rason berdad, cu no ta prudente pa e cana cu tanto placa efectivo asina riba dje, pues ta di mes cu ta busca un forma pa e placa por yega sigur riba un cuenta di banco.
Na final hues a dicta lo siguiente:
- Ta ordena Aruba Bank, pa tanten cu no tin un otro decision den bodemprocedure di e caso, pa dentro di 24 ora (1 dia) despues di e sentencia aki, pa habri un cuenta di banco na florin pa Bochincha Container Yard (BCY) y tene e cuenta habri tambe bou di e reglanan regular y cu un tarifa regular tambe, bou di e condicion cu si un hues penal condena Otmar Oduber pa e locual ta acusand’e awo, cu Aruba Bank ta autorisa pa cera e cuenta mesora y para tur relacion comercial cu Bochincha, dunando nan un termino di aviso di dos luna di tempo.
- Ta impone un multa di Afl. 2.500,= pa dia of un parti di dia pa Aruba Bank, den caso cu e banco no cumpli cu e ordo di hues of no cumpli cabalmente cu e ordo, te na un maximo di Afl. 500.000,=.
- Ta condena Aruba Bank den e gastonan di e procedura, na banda di BCY, balora na Afl. 668.64 na leges y Afl. 1500.00 na salario di abogado.
Loading…
Reload document 
Open in new tab 
