Na momento cu defensa di Alan Howell – acusa di malversacion y falsificacion – a hiba palabra, abogado mr. Doris Canwood a tuma un ora y mey pa bay riba tur e puntonan treci dilanti door di fiscal y a contradeci of mustra cu e cosnan no ta manera a pint’e. E caso a cuminsa lora na 2020 ora cu Financial Intelligence Unit (FIU) di banco a bati alarma cu tin transaccion sospechoso cu ta bay for di cuenta di e fundacion di POR (cu ta haya su placa for di presupuesto di Parlamento) pa e cuenta personal di Alan Howell.
Pa tur esaki tin un splicacion y den palabra corto bisa, Howell a paga hopi cos for di su mesun saco pa partido y e fraccion. E fraccion di POR den Parlamento no a haya su placa mesora y tin cierto cosnan cu mester a haci prome cu e placa a yega finalmente. Den e periodo cu POR tabatin representacion den Parlamento, a haya un suma di casi mey miyon florin y a uza tur esaki, segun e parlamentarionan a dicidi.
Un di e puntonan treci door di fiscal ta sumanan cash cu a saca di e cuenta bancario di e fundacion. A papia di 50 mil florin, cu tabata pa e dos parlamentarionan, Howell y Lopez-Tromp, por a cubri nan gastonan. Un suma di 25 mil florin a bay pa Parlamentario Lopez-Tromp cu tabata destina pa su ruman muhe, kende tabata encarga cu media coverage y e otro parti tabata pa Howell paga “E Arubiano News” (Farrah Boekhoudt) e suma di 22 mil florin pa media coverage p’e. Y e tres mil tabata pa e salario di su tata cu tabata conseh’e. E ultimo aki, e abogado a entrega na Corte e facturanan cu el a paga e 22 mil florin.
Si analisa e punto di 50 mil florin, e abogado a bisa cu su cliente ta haya hopi straño cu ta persiguie y Marisol Lopez-Tromp no.
Tambe tabatin un suma di 5 mil florin cu a entrega cash na Marisol Lopez-Tromp, kende a pidi pa tuma luga di e forma aki. El a insisti pa haya esaki lihe prome cu e bay ocupa e puesto di minister.
Mester a pag’e cinco mil florin pa gastonan di biahe y estadia cu el a haci relaciona cu un curso di derecho di mucha. E curso mes no por a tuma luga mesora door di COVID. E tesorera no a haya mas informacion di e curso aki.
Tambe tabatin un suma di casi 18 mil florin cu a bay pa Alan Howell, lider di POR, relaciona cu salario cu partido a paga pa e fractiemedewerker Carolina Rojas-Lacle. Howell a bisa cu el a entrega e placa aki na partido. No por a pone direct riba e cuenta pasobra e cuenta tabata “dormant” y no por a haci uzo di dje.
Sinterklaas
Pa loke ta e ponencia cu Sinterklaas a trece regalo pa Howell y van Putten, el a duna un otro version. Pero prome el a splica hues cu hopi biaha riba whattsapp e hendenan ta haci tur sorto di joke tin biaha y dobel sentido pa cual no ta tur cos mester tuma na serio. “Mi ta spera cu mi telefon no cay den man di autoridadnan nunca, pa nan lesa tur e cosnan cu ta haci joke cu nan den e mensahenan,” e abogado a bisa.
Por corda cu fiscal a señala cu Jacqueline van Putten a puntra Howell si tin bashi y e lider di POR a contesta cu Sinterklaas a bisa cu van Putten ta haya 1000 y e vice dies mil. “Esaki, un biaha mas, tabata un joke y nada mas.” El a splica cu e suma di diesun mil florin cu Jacqueline van Putten a saca for di banco tabata pa Howell berdad. E suma di dies mil tabata pa paga e facturanan di E Arubiano y 1000 florin tabata pa promocion di un evento di fin di aña di partido POR. Esaki sinembargo no a bay door y a wanta e suma aki como e gastonan di oficina no premira.
Pues, e abogado defensor a conclui cu den e puntonan menciona tampoco por papia di malversacion.
