Diasabra anochi den un stadion cu miles di persona y cu un cobertura mundial via ESPN, ABC y SkySports Aruba su nomber a resona durante e ceremonia di apertura di ‘World Games Special Olympics 2023 na Berlin.
Den orden alfabetico e mas di 100 pais participante a sali den un parada di pais. Naturalmente ora cu a yega turno di Aruba, e delegacion a cana den e stadion pa asina saluda e publico cu tabata presente. Bisti cu nan uniform cu e colornan di nos bandera y cu caranan contento, nan tabata cana orguyosamente representando Aruba.
E parada di paisnan tabata tin un duracion di aproximadamente dos ora pa despues continua cu un e espectaculo sumamente bunita. A conta cu discurso di e Presidente di Alemania, Frank-Walter Steinmeier, Presidente di Special Olympics y otronan. Tambe tabata tin presentacion musical di Madconn, Blue Man Group y diferente otro artistanan invita. E anochi a termina cu un show di vuurwerk impresionante.
Un parti hopi bunita di e ceremonia tabata cu rond di e stage principal tabata tin awa. Cada delegacion mester a trece un tiki awa di nan respectivo pais. Na momento di drenta e stadion, un representante di e delegacion mester a basha e awa aki na e stage. Esaki ta un simbolo di e union entre cada pais cu ta participando.
Nadine Liebhardt, Marketing Manager di Digicel Aruba, Boneiro y Curaçao tabata presente tambe hunto cu e atletanan durante e apertura. Pa su persona e tabata un honor pa por a cana hunto banda di e atletanan den e stadion. Liebhardt a conta 24ora.com cu e emocionnan tabata hopi halto pero e energia cu e atletanan tabata tin for di momento cu nan a yega e stadion te cu ora cu nan a mester a presenta dilanti publico tabata uno hopi contagioso.
Raquel Lesire ta mama di e atleta Byron Lesire. El a conta cu Lesire ta participando den e competencia di Bowling. El a splica 24ora cu e emocion na momento cu e la mira Byron cana den e stadion ta uno cu bo no por splica. E orguyo cu bo ta sinti como mama ta uno unico.
Digicel users let’s support Special Olympics by donating Afl 1,- by texting 𝗕𝗘𝗥𝗟𝗜𝗡 to Nr 5151!
SPECIAL OLYMPICS WORLD GAMES
E di 16 edicion di “Special Olympics World Games” ta un ehempel bibo di inclusion den accion, poniendo hende cu un disabilidad intelectual hunto cu nan gana di supera deportivamente, den luz na nivel mundial.
Un total di 19 atleta ta na Berlin actualmente pa asina representa nan pais den e World Games Special Olympics. Digicel ta sosteniendo Special Olympics Aruba pa 15 aña caba.
Aruba semper ta resalta den e deportenan di futbol, bowling, atletismo y bocce. A yega di gana medaya di oro den futbol y atletismo, medaya di plata den bocce y bowling.
