E ta un persona hopi admira. Un tata hopi stima. Semper cla pa yuda. Raul Schwengle di apenas 54 aña di edad a bay sosega pa semper diadomingo riba Dia di Tata. E tabata traha na Kooyman y tabatin un bon funcion pa basta aña caba eynan.
Diasabra el a bay traha y tabata bon. Diadomingo a lanta y tabata sinti su mes malo. A hib’e hospital mesora. E aña aki el a haci su testnan pa cu curason y tur cos tabata mustra bon, segun dokternan.
Diadomingo cu el a cuminsa sinti malo, a purba pa e bebe pilder pa alarga su sanger y haci’e mas awa. Na hospital dokternan a cuminsa atende mesora cu Raul. A yega di haci catarisacion via su brasa. E biaha aki a bay haci catarisacion via otro parti di su curpa. Eynan a bin descubri cu e tin un ader mayor cu ta pega.
Raul tabata na tino y a pidi dokternan pa haci lihe pasobra e tin basta dolor. Ademas, e kier bay cas pasobra ta Dia di Tata awe. Durante e proceso a descubri e ader pega y pa ora kier a reacciona, e presion tabata abou y curason tabata suak.
Henter e trabou di catarisacion no a termina exitoso y Raul Schwengle a fayece den e proceso na hospital. Un sla duro pa famia y su amistadnan. Tambe un shock pa su coleganan na Kooyman.
Nos ta desea e famia completo y su coleganan hopi forsa den e momento dificil aki. Cu Raul Schwengle su alma sosega na paz.
