Diasabra tabata un dia grandi pa e mundo di scouting, unda cu a tene e clausura di un competencia entre tres drumband di Scouting, pero tambe celebracion di aniversario di un grupo di scout.
Tur esaki tabata tin Carnival Village como sede. Roger Lake, Lider di grupo di Scout St. Paulus Michael’s, cu tabata contento di por a celebra 40 aña di existencia di e grupo aki y tambe 15 aña di existencia di nan drumband.
Pa loke ta e clausura di e competencia entre tres drumband di scouting: Grupo Scout Oro Ubao, Grupo Scout Santanero y Grupo Scout combinacion di Monsegnieur Oscar Romero y Sint Hyacintus. E sistema di presenta tabata parti den rond, di seis minuut. Cada grupo a presenta dos biaha c’un duracion di 6 minuut. Riba e anochi aki, e huradonan a husga e coordinacion en general, harmonia, partiicpacion di conhunto y ambiente cu e gruponan ta forma tocando.
PROME BIAHA PARIBA DI BRUG
Lake a bisa cu, den cuadro di nan celebracion di 40 aña di existencia como grupo di scout y tambe 15 aña como drumband, nan a dicidi di rindi honor na San Nicolas y organisa e competencia aki den Carnival Village.
Como lider di scouting, pa medio di musica, nan kier stimula e muchanan cu tin otro algo otro, cu solamente loke nan ta conoce di scouting, manera hisamento di bandera, pero cu nan tin musica tambe den scouting. Esaki por ta hunga un rol tambe den bida di e mucha, cu den futuro lo kier bay sigui engrandece su pasion pa musica door di bay un scol di musica.
PUBLICO PRESENTE
Como grupo, sigur tabata un grato placer di wak un publico grandi bin wak e presentacion. Cada grupo di scout a bin cu nan animacion y tambe e publico cu a bin tambe pa bin celebra hunto cu nan. Esaki sigur ta demostra cu scouting na San Nicolas, ta bibo.
PREMIACION
Door cu esaki tabata e prome biaha cu a organisa e actividad aki, tur tres grupo participante a haya un premio. Grupo Scout Oro Ubao a sali e ganado absoluto, Grupo Scout Santanero a Sali na di dos luga y Grupo Scout Combina Monsegnieur Romero/Sint Hyacintus a resulta na di tres luga. Cada grupo a haya un cadeaubon cortesia di Cliffix y e grupo ganado a haya un drum.
GRADICIMENTO
Na final, Lake a gradici e mayornan di e muchanan cu ta forma parti di e grupo St. Paulus Michael’s, cu ta kere den e grupo. Ta 40 aña di aporte na scouting.
Den hurado tabata tin Marvin Dinzey, John Hassel y Erick Lake. Tres persona cu a aporta na e actividad aki, pa cual sigur Grupo Scout St. Paul Michael’s ta sumamente agradecido.
