Ricky Hodge, of manera e narador deportivo di Guadeloupe a yam’e, “Ricky Martin”, a saca cara di Aruba anotando e prome y unico gol di e wega entre SV Dakota y Solidarité Scolaire di Guadeloupe. E wega a caba na mas o menos 96 minuut cu un solo gol pa e ekipo Rubiano. Esey ta hiba nan na dos wega hunga y dos wega gana!
Diamars awo nan ta hunga contra Trinidad & Tobago y si gana nan, mesora Aruba ta pasa pa semi-final dia 11 y e wega final dia 13 di augustus 2023, na Sint Kitts.
SV Dakota ta existi desde aña 1947 caba y durante su trayectorio a sa di logra conkista e titulo di campeon di futbol division di honor na hopi di ocasion. E ultimo biaha cu el a bay cas cu e trofeo tabata na aña 2022. Na tur ta papia di mas o menos 175 hungado den total. Den e seccion di Division Honor, ta conta cu un ekipo cu 25 hungado, 4 staff tecnico y 4 miembro di directiva. Coach ta Jonathan Lake cu ta conta cu un amplio experiencia den futbol local.
SV Dakota, siendo campeon di futbol division di honor di Aruba na aña 2022, ta representando nos pais den e CONCACAF Caribbean Shield. Nan mester hunga tres wega pa por clasifica pa e siguiente rond, pa purba gana e copa. Ganado di e campeonato aki, lo hunga otro aña den e CONCACAF Caribbean Cup.
SV Dakota a gana Solidarité Scolaire awe. E ta un team di division di honor di Guadalupe, cu sede na e ciudad di Baie-Mahault. Nan ta originalmente di Pointe-à-Pitre. Nan a gana e campeonato nacional na Guadeloupe aña pasa.
Esaki ta e di seis edicion di CONCACAF Caribbean Shield 2023, e competencia internacional anual di futbol di clubnan di segundo nivel di e region Caribense. Pa por participa bo club mester ta afilia na Caribbean Football Union (CFU).
E ta un competencia di segundo nivel di e CONCACAF Caribbean Cup, cu antes tabata yama Caribbean Cup Championship. A introducie na aña 2018 specialmente pa clubnan riba un standard profesional. E campeonato ta organisa door di CONCACAF.
SV Dakota a hunga su prome wega diabierna ultimo y tabata contra e ekipo SWA Sharks di e islanan Turks and Caicos. Aruba a gana cu score di 2-0, cu gol di Cristian Peña y Richard de Sousa.
Exito pa diamars awo….Aruba ta pendiente!
