Tabata parlamentario Arthur Dowers di AVP hunto cu su colega Mike de Meza, kendenan dia 16 di januari, 2023 a entrega keho di malversacion cometi na Arubahuis contra Guillfred Besaril (ex-Minister Plenipotenciario) desde 2018 pa 2022. Despues di e detencion diamars mainta, Dowers a bisa “mi no ta di hubilo cu a detene sr. Besaril.”
El a enfatisa cu p’e ta importante cu e proceso di husticia ta cana su caminda. Momento cu el a cuestiona si tin investigacion contra Besaril, ta pasobra nan tabata kier claridad di kico tabata e posicion di mr. Evelyn Wever Croes, kende a crea duda den henter e proceso di investigacion cu e lo no tabata dispuesto pa duna keho contra Besaril, y no a duna keho sino otro hende a hacie.
E ta enfatisa cu tabata hopi cla, y e ta haya cu Wever Croes mester duna un splicacion, y te awe cu a detene Besaril e parlamentarionan no a haya e rapport di CAD (Centrale Accountantsdienst) den nan man.
“For di prome dia a bisa Evelyn Wever Croes cu Besaril tabata haciendo cos robes. Tres aña despues cu Besaril tabata haciendo baina, a mand’e un carta bisando cu e meneer tin tres aña haciendo cos robes. No por ta posibel cu abo ta esun responsabel pa Besaril, y bo no sa kico ta pasando. Mi conclusion ta cu e señora aki ta parti di loke a pasa na Arubahuis y p’esey a tap’e.”
Despues cu e carta a “leak” ainda a permiti Besaril core campaña y bira Minister Plenipotenciario atrobe. E ta cuestiona e prome minister mas ainda pasobra en bes di pone cos den man di autoridad, a dicidi pa laga un comision bay haci investigacion cu a conclui cu no por tapa y e bom a rementa.
Pa e fraccion berde ta inaceptabel cu ta kita entre otro placa di remedi y hisa schoolgeld, pa paga miyones pa cera contrincante politico mientras cu “bou bo responsabilidad ta laga nan haci y deshaci. Ta lag’e bin Aruba djodjo riba placa di pueblo, abo mester a acoordeer esaki. Pues bo mester tabata sa kico e ta haci.
E ta haya cu Evelyn Wever Croes a lanta tur sorto di cos di Integridad pa tapa tur loke tabata haci, ta e momento pa “acepta cu abo ta e rector magnificus di corupcion, y bisa pueblo dispensa y entrega retiro na gobernador”.
