Diabierna dia 3 di augustus, hefe di Archivo Nacional Aruba, Sr. Raymond R. Hernandez a haya bishita di Sr. George Davelaar di Corsou y Sr. Dufi Kock di Aruba. Sr. George Davelaar ta un aficionado di plak ‘modelbouw’ specialisa den e ramo di diorama. Diorama ta un mundu di miniatura caminda obhetonan ta wordo poni di tal forma cu e ta crea e impresion di ta real.
Na 2016 Davelaar a traha un diorama di e ‘Torpedo’ cu a subi tera na Eagle Beach, Aruba, dia 16 di februari 1942. Su deseo semper tabata pa entrega Aruba e diorama aki y esaki a bira realidad na momento cu el a cera conoci ku señor Dufi Kock via di Facebook.
Mirando e balor historico di e diorama aki pa su isla, sin pensa dos biaha, sr. Kock a bisa Davelaar ku e diorama tin ku bai na un luga caminda e pueblo di Aruba por admira e obra di arte uniko aki, traha pa e maestro George Davelaar. Den cooperacion cu Archivo Nacional Aruba e entrega a tuma lugar diabierna 3 di augustus ultimo. Na e ocasion aki Davelaar a realisa su soño di entrega e diorama di e ‘Torpedo’ ku a subi tera na Eagle Beach.
Na 2006 Sr. Davelaar a participa na competencia den e ramo di diorama riba tereno internacional na Europa. Apesar cu e diorama akí no a logra di gana medaya, e a impreciona e jueznan y creadornan di diorama enormemente pa e arte, e suseso peligroso, pero mas pa e aporte impagabel cu Aruba a duna na aliadonan y mundu henter durante Segundo Guera Mundial. Den su carera el a participa na 7 competencia internacional di diorama (entre otro na Hungria y Belgica), cu e diorama titula ‘Brotherhood Parade WW1-1918’.
Na 2017 y 2018 e a logra di gana tres medaya. Dos medaya di oro, un na Hulanda, e otro na Tjekoslovakia y un medaya di plata na Alemania.
Archivo Nacional Aruba kier a gradici Sr. Davelaar y Sr. Kock pa e bunita gesto aki y kier a invita e comunidad di Aruba cu kier admira e bunita obra aki pa pasa libremente na ANA pa haci esaki.
