Aquanette Gunn a sali di e encuentro di parlamento cu Minister di Husticia Rocco Tjon no mucho satisfecho. Mas decepciona e ta pa cu e actitud di Presidente di Parlamento, unda cu e ta tuma decision sin tene nan pensamento of deseonan na consideracion.
E motibo di e encuentro tabata pa minister duna informacion riba e contracto firma cu e compania Sadi SAS (Doño di e Helicopter cu ta uza pa Cuerpo Policial).
Pa cuminsa e fraccion di MAS, cu Gunn ta representa, a pidi pa haya un bista den tur e documentonan pa despues e reunion sigui. E ta haya lamentabel cu e Presidente di Parlamento “no a ni considera kico tabata e postura di cada fraccion. Pero a simplemente el a tuma e decision cu e minister ta bay duna su presentacion y despues e parlamentarionan ta haya e chens pa tuma nota di tur e documentonan.”
E tabata masha tiki tempo pa profundisa. Pa e motibo aki ta bay haci un peticion na e minister pa haya acceso na e documentonan aki, den forma mas detaya. “Awo no tabatin e espacio ni e tempo pa haci esaki.”
