Anthony Irausquin ta prome director pa cobra Wever-Croes norm

2418

Diabierna ultimo Prome Minister Evelyn Wever-Croes a reuni cu e director nobo di N.V. Elmar, Anthony Irausquin hunto cu presidente di hunta di directiva di Elmar, Shonno Maduro. A splica di su plannan pa garantisa un futuro stabiel pa N.V. Elmar y su empleadonan. 

Anthony Irausquin ta e prome director riba cual lo aplica e Wever-Croes-Norm, pa pago di su salario y compensacion. Gabinete Wever-Croes a aplica un norma den cual director di departamentonan di gobierno y companianan estatal no por gana mucho mas cu minister presidente di nos pais. Gobierno ta convenci cu tin un disgusto den comunidad cu tin directornan di companianan estatal ta gana salarionan exorbitante. 

Gabinete Wever-Croes a declara desde principio cu e tipo di situacionnan aki no por continua y a cambia e maneho: ningun director di compania por gana mas cu 130% di e salario di un minister. Prome Minister a aplica e maneho aki pa directornan cu nombra nobo y Anthony Irausquin di N.V. Elmar ta e prome. 

“Companianan estatal ta di pueblo y nan no tey pa enrikece ningun hende. Nan mester sirbi pueblo y comunidad. Nan mester garantisa salario di trahadonan cu ta traha cu alma y curpa pa e companianan por brinda servicio. Gabinete Wever-Croes no ta papia so, nos ta actua tambe! Mi a keda hopi impresiona y satisfecho cu e reunion y di por mira cu tin un vision y cu den e vision nobo di N.V. Elmar e ser humano ta central”, asina minster presidente Evelyn Wever-Croes a expresa.