Anthony Bermudez ta un chauffeur di ambulance. E tabata un tempo caba na ambulance dienst pa 16 aña. El a bay den exterior pa 4 aña. El a haya e chens pa bin bek y a tum’e cu man habri. Bermudez a sigui splica cu nan a haya training hopi anja atras, pero ta hayando training nobo. Ta un diferencia entre e prome cu nan a yega di haya cu esunnan cu nan ta hayando awo. E ta yuda hopi mes ora cu bo ta tras di stuur di ambulance. Bo ta core un ambulance, cu spoed y cu tin preferencia. Bo tin cu wak bon, maske bo tin sirena, pero bo tin cu paga tino bon, riba e otro autonan cu ta banda dibo of cu ta dilanti bo. Hopi biaha hende of auto ta purba di crusa bo dilanti. Bo mester ta atento y sinja wak autonan hopi mas dilanti dibo of banda dibo, den breedte, pa bo por transporta e pashent mas sigur, mas stabil cu ta posibel pa yega su destino unda e tin cu bay. Of ora bo tin cu bay pa un emergencia tambe.
Chauffeur cu experiencia
Un training asina ta hopi importante pa conocemento di e chauffeur. Esun di actual y e entrenamento prome tin un diferencia grandi. E ta amplia hopi actualmente riba coremento riba brakemento, transport di e pashent, e kier pa ta mas stabil cu ta posibel. Mas comodo pa e pashent, pio manera pa pashentnan ora cu nan tin fractura, door di e camindanan cu nos tin cu ta basta malo toch, purba di core mas netjes posibel pa e pashent por sinti’e mas safe ora di bay hospital.
Con conciente
Pa loke ta e automobilistanan riba caminda, Bermudez a splica cu esey ta laga hopi di desea. Hopi no ta coopera cu ambulance. Tin ora bo tin cu haci maniobranan hopi stranjo y ta pesey e les aki tambe ta pa sinjabo hopi ki precaucion bo tin cu tuma mas tanto posibel pa evita sorto di accidentenan door cu autonan tin ora no ta coopera. Problema grandi cu tin ta ora cu un auto ta wak bo cu sirena, y kier bin tras di e ambulance pa e yega su destino mas lihe. Pero cu tin cambio, sigur cu si, segun Bermudez. Cu e trabao aki tur dia bo ta sinta cosnan nobo. E trayectoria cu e tin, cada dia bo ta sinja algo, pero awo bo ta sinja mas hopi.
Curso
Awor aki nan ta den un curso cu ta dura algun siman, pero no ta simplemente pa maniobra un ambulance, salba bida di hende, prepara como verpleegkundige y percura pa ambulance ta uno sigur riba caminda. Ta haci control riba ambulance. Bermudez a splica cu esaki ta para den e exigencianan di e sistema nobo cu tur mainta cu subi warda, prome cos cu tin cu haci ta check e ambulance completamente, parti di e motor, taira, parti paden, luz, zwaailicht, etc., cu ta toca abo como chauffeur. Si tin algun mankement na e auto mester geef door di biaha y ta sak’e for di servicio y ta busca un otro pa core si e ta up to date y cu esey lo bo sali e ora. Tanten cu tin algo fayo, e por ta chikito mes, e auto eynan no ta sali. E ta keda eynan y ta subi riba un otro auto.
Training
Bermudez a splica cu nan tin ambulancenan nobo. E mes te ainda e tey como derde persoon te ora cu caba cu e opleiding si tur cos bay bon na November y nan ta cuminsa mes na Januari. Tur luna tin cu bay Corsou pa cinco dia. Esaki a toca nan na Aruba pasobra nan kiermen cu e reglanan di Corsou ta otro contra esun di Aruba, door di esey ta haci’e akinan. Manera cu nan caba aki dos siman, nan tin cu bay Corsou bek tur fin di luna pa cinco dia, te November, ora cu e examen tuma luga tambe na Corsou.
