Caribbean Beton ta un di e companianan estableci na Budui y a cuminsa un caso den Corte pa motibo cu nan a para nan operacionnan. Amador Gutierez ta representante di Caribbean Beton.
El a splica cu semper nan a opera nan empresanan teniendo na cuenta semper e impacto di nan trabou riba e area, social y ambiental. Kedando den e margen di bon practica ambiental y pa tin un negoshi productivo. A dura casi dos aña pa investiga cual ta e miho sitio pa bini cu un planta di beton. Nan a papi acu Cala Romano cu tin mas di 20 aña estableci eynan. E materialnan cu nan mester uza no ta wordo haya na cualkier sitio y nan mester establece unda ta haya esakinan, y den e caso aki na Budui / Seroe Crystal.
Na momento cu nan a tuma e decision no tabatin ningun cas hopi cerca y den e area cu e biento ta bay no tabatin cas. Nan por a establece eynan cumpliendo cu tur e regulacionnan ambiental, manera na tur parti di mundo. Hasta a reuni cu e bisiñanan pa mira si nan tin cualkier sugerencia pa tene na cuenta y pa logra un bon relacion.
El a bisa cu ta imposibel pa haya santo y piedra sin causa ningun daño na e naturalesa pero si por percura cu esaki no ta di e hopi ey. E desaroyo mester ta harmonico cu e ambiente na e sitio.
E demanda ta hopi ya cu e analisis economico cu a haci ta mustra cu tin un mercado, pesey a haci inversion grandi. Banda di esey nan tin proyecto di vivienda pa cual mercado un parti di nan produccion ta destina. Pero banda di esaki, nan ta sacando producto di bon calidad cu te ainda no ta wordo produci na Aruba. E business plan a wordo otorga na Gobierno pa haya e vestigingsverguning. Aworaki e demanda cu nan ta cumpli cune ta di mercado local, personanan cu ta construyendo nan mesun cas. Y otro parti ta wordo uza den e proyectonan cu nan mes ta realisa.
Nan a bay Corte pasobra nan ta kere cu nan tin razon y si tin algo cu nan mester haci pa mehora pa e compania por funciona, nan lo hacie. Companianan hopi mas grandi cu esun di nan na otro parti di mundo ta establece den ciudadnan grandi na Hulanda y Merca, y me-mey di casnan. E ta algo cu ta biba cun’e na tur parti di mundo. Semper por resolve cualkier problema cu por tin.
