Trahadonan di un proyecto di Mota Engil diamars mainta a mustra nan disgusto den e proyecto cu nan ta trahando riba dje banda di Fermin’s Bar na Noord pa falta di pago.
E grupo di trahadonan ta cobra pa quincena y nan tin dos quincena caba sin cobra. Segun por a compronde, nan ta trahando pa un subcontratista cu tin e relacion directo cu Mota Engil.
E trahadonan na e sitio a bisa cu nan no por wanta mas, pasobra nan no por paga nan gastonan y placa pa cumpra cuminda no tin t’ey. Nan siguiente fecha di pago for di e compania Job Bank ta diabierna awo. Si nan no haya pago, nan lo pone trabou abou como forma di presion. E proyecto aki na Noord mester keda entrega denter di tres siman.
Loke ta remarcabel ta cu e empleadonan cu ta traha directamente cu Mota Engil si ta ricibi nan placa, o sea nan salario. E trahadonan disgusta ta bisa cu e informacion cu nan a ricibi for di nan doño di trabou ta cu Mota Engil no a paga e contratista.
Di Mota Engil no a logra haya reaccion te ainda pero si por a compronde cu ta trahando riba e proceso pa cumpli cu e trahadonan mas lihe posibel. No a menciona kico ta causa di e retrazo.
UPDATE: Algun rato despues trahadonan a tuma contacto cu nos redaccion pa informa cu nan a ricibi nan pago.