Algemene Rekenkamer a publica su rapport Publiek Private Samenwerking – investigacion riba maneho di e contracto y suministro di informacion di proyecto Green Corridor y Watty Vos Boulevard. Cu e investigacion aki Algemene Rekenkamer tin como meta pa brinda les pa futuro. Esaki ta importante mirando cu den e siguiente añanan lo mester paga e sumanan grandi cu ta bin for di comunidad pa proyecto PPP. Resultado di e investigacion ta duna tanto Parlamento como e ciudadano bista riba colaboracion riba termino largo, entre sector publico y sector priva unda cu e responsabilidad di Pais Aruba y sector priva ta diferente cu e contractnan tradicional.
Algemene Rekenkamer ta conclui, cu e aspectonan investiga den e maneho di contracto di e dos proyecto aki ta na ordo, pero e riesgonan financiero riba e proyectonan PPP no ta suficientemente cubri. Tampoco no ta claro e forma con ta cubri e proyectonan den presupuesto y financieramente riba termino largo. Ademas Algemene Rekenkamer ta di opinion cu mester mehora suministro di informacion na Parlamento tocante e indole y tendencia di e proyectonan PPP y e riesgonan financiero cu esaki ta trece cune. Algemene Rekenkamer a raporta anteriormente den e rapport BO Aruba (2018) comentario critico tocante por ehempel uzo di financiamiento off balance. Aunke e no ta afecta e debe di Pais Aruba na comienso di e proyecto, sinembargo Pais Aruba mester paga e gastonan di e financiamento den e siguiente añanan. Mester considera cu cautela e concepto di tene e proyectonan off balance. No pasobra por, mester tambe.
E intercambio di informacion entre e departamentonan gubernamental di Pais Aruba, esta Dienst Openbare Werken (DOW, ministerio di Infrastructura) y Directie Financiën (ministerio di Finanzas) mester mehora, segun Algemene Rekenkamer. Mehoracion den suministro di informacion ta necesario pa esnan responsabel por carga nan responsabilidad pa e proyectonan PPP, pa di e forma aki e proyectonan por termina di forma exitoso.
Recomendacion di Algemene Rekenkamer
Algemene Rekenkamer ta recomenda minister di Infrastructura y tambe minister di Finanzas pa traha rapport integral pa Parlamento, den cual no ta raporta solamente riba e progreso, pero tambe riba maneho, gasto, cobertura financiero y riesgo financiero a corto plaso y riba termino largo. E rapportnan mester contene tambe e medidanan pa limita y mitiga riesgo y mester duna un bista pa futuro.
Tambe segun Algemene Rekenkamer ta importante pa keda inverti den desaroyo y conservacion di conocemento na DOW y percura pa DOW keda ‘atento’ pa den futuro. E ta recomenda pa fortalece e posicion di Directie Financiën y percura pa tin suministro di informacion na tempo y completo riba e proyectonan, en particular riba desaroyo di e gastonan. Ta importante pa involucra Directie Financiën desde inicio y den evaluacion di e riesgonan y pa configuracion di e rapportnan pa Parlamento.
Den caso di futuro proyecto PPP, ta necesario pa prome cu Parlamento aproba esaki, nan haya suficiente informacion riba implicacion financiero. Esaki mester inclui tambe con ta influencia e situacion financiero riba termino largo y con ta garantisa e financiamento.
Ambos minister a reacciona riba e rapport di Algemene Rekenkamer. E minister encarga cu Finanzas no a reacciona riba contenido di e mensahe di e rapport. E minister encarga cu Infrastructura a duna di conoce cu a repasa e recomendacionnan cu hopi atencion y cu lo discuti esakinan cu entre otro minister di Finanzas y DOW. Tambe ya caba a tene combersacion entre e minister y DOW pa locual ta trata mehoracion di sistema pa raporta den direccion di Parlamento. Algemene Rekenkamer ta pone enfasis pa den consulta cu minister di Finanzas, realisa colaboracion entre DOW y Directie Financiën pa e rapportnan completo na Parlamento. En bista di e continuidad rekeri a largo plaso, mester keda atento pa optimalisa e posibilidad di logra e resultado desea, door di duna contenido riba interpretacion di e rol como tambe responsabilidad den cuadro di palabracion haci.
Durante e investigacion Algemene Rekenkamer a haya sosten di dr. Cor van Montfort, cu actualmente ta labora na e Vrije Universiteit di Amsterdam y Universiteit di Tilburg. Sr. van Montofort tin varios aña di experencia na Algemene Rekenkamer di Hulanda, entre otro cu investigacion y estudio internacional den area di PPP.
