Diamars tabata un dia grandi pa amantenan di bingo. Despues di un lucha largo, gerencia a cuminsa cu Bingo na Cool Casino na Riu Palace. Carissa Ramirez, presentado di Bingo, a splica cu diamars pa 1’or di merdia tabata asina leu cu Cool Casino a inaugura wega di bingo.
No ta conoci e fecha ainda, pero e intencion ta pa cuminsa cu un di dos sesion di wega di bingo pa 4’or di atardi. Despues cu gerencia a keda cla cu tur tramite, a logra pa propaganda e evento aki pa algun dia so. Asina mes e sala tabata hopi yen di fanaticonan di wega di bingo.
Esnan cu kier participa den e Bingo ta cumpra un buki di 11 wega cu ta costa solamente 8 dollar, incluyendo e jackpot progresivo cu ta cuminsa na e bunita suma di 10 mil dollar. Esaki ta si e persona logra canta Bingo den 50 yamada. E prome wega ta uno di cortesia. El a splica cu normalmente un buki di bingo tin 10 wega pero den esaki e tin 11 wega. E prome wega, cu nan ta regala, tin un premio di 100 dollar. “Na ningun otro casino ta regala un wega di bingo y p’esey e ta yama wega di Cortesia.” E ultimo wega cu ta full card ta paga un premio di 600 dollar.
E inscripcion pa bira miembro di e casino ta algo opcional, pues cualkier persona por participa den e bingo y gana un di e premio, inclusivo e premio progresivo. Esnan cu ta miembro por hunga na slotmachine pa acumula punto. Tin premionan atractivo, pa puntonan cu a acumula. Ta conseha pa bira miembro pa por bin na remarca pa tur e premionan cu ta regala. Porta pa Bingo ta habri pa 11’or di mainta y ta cuminsa pa exactamente 1’or di merdia. Ta hunga prome seis wega y despues ta tuma un pauze pa sigui despues cu e resto di weganan. Pero interesante ta cu tambe tin weganan di consolacion cu tambe tin premio. “Man bashi bo no ta sali,” Ramirez a bisa. Si no gana den e wega normal, tin weganan adicional di 1 dollar, tin doorprizes, ta cambia e bukinan di bingo regularmente. Y a introduci un special cu cada persona a gana den e prome bingo ta haya un ticket gratis pa e siguiente dia.
E bingonan awo ta 4 dia pa siman: diamars, diaranson, diabierna y diadomingo. Segun e apoyo ricibi, e dianan por bira tur dia of double bingo. Tur cos ta depende di e interes.
E aña tabata bon pa Cool Casino pero tabata falta e evento di Bingo cu awor tey pa e amantenan.
