Secretario di Estado pa Relacionnan den Reino Hulandes, esta Alexandra van Huffelen a bisa awe for di Hulanda cu Aruba a pidi Conseho di Minister di Reino permiso pa por elimina e cortamento di 12,5 porciento den salarionan gradualmente. E mandatario Hulandes a corda cu esaki ta por lo menos un di e condicionnan palabra anteriormente pa Hulanda a brinda Aruba sosten financiero di emergencia. Conseho di Minister di Reino no a bay di acuerdo cu esey.
Alexandra van Huffelen a menciona un rato pasa den un relato di prensa cu e motibo cu Conseho di Minister di Reino Hulandes a nenga e peticion di Aruba ta entre otro pasobra cu Aruba ainda ta haci apelacion riba fiansa di sosten di emergencia siendo cu no tin un presupuesto balansa. E tema aki tambe tabata parti di e condicionnan cu Aruba mes a firma ora a yega na acuerdo pa fiansa, basa riba un formula den cual Aruba no mester paga Hulanda ningun interes riba e suma presta. Aruba a priminti di lo baha su gastonan y subi entrada mesora, pero ningun di dos parce di a logra y tampoco pa pasa presupuesto pa aña 2022, cu di acuerdo cu e protocol, mester tabata aproba prome cu cambio di aña.
Secretario di Estado Alexandra van Huffelen a conforma cu locual si a palabra ta, cu Aruba lo bin cu proposicionnan pa duna e reduccion di salario un otro contenido. Kisas e no mester ta den forma di kita 5% mensual y otro beneficionan, pero por reduci gasto di personal den otro forma sin cu e ta mishi directamente cu e entrada mensual di e empleado publico. Mas leu, Hulanda a bisa awe, cu ta studia hunto cu Aruba, Corsou y Sint Maarten, bao di cua condicionnan riba termino por elimina e cortamento den salario gradualmente. Aunke cu ya ariba a menciona caba cu e lo ta mara na un presupuesto balansa, cu probablemente nos lo no logra por lo pronto.
