Tur hende ta puntra ki dia tin continuacion di e famoso segunda tanda di e reunion yama pa entrega mocion di desconfiansa contra Minister Marisol Lopez Tromp. Cada persona tin un otro contesta riba si e reunion ta sigui y ki dia.
Alan Howell di e fraccion di POR, cu ta esnan cu a pidi e reunion na prome instante, a bisa cu ta keda na Presidente di Parlamento Ady Thijsen pa yama un reunion di Parlamento. Ta keda na dje pa bisa ki dia e reunion ta sigui.
Thijsen sinembargo tabatin un reaccion diferente. “Sr. Howell ta un nobato den esaki y kisas no ta compronde e procedura. Ta boso mester sa si boso a huma e pipa di paz of no a hum’e, ta nan mester sa. Ta nan cu nan.”
Pero Howell ta insisti cu e no por yama e reunion sino Presidente di Parlamento.