Riba rednan oficial di Gobierno a anuncia un bishita di Secretario di Estado di Hulanda, Raymond Knops, pa islanan den Caribe Hulandes. Loke cu a hala atencion ta cu no ta menciona Aruba den e relato aki.
Segun e relato ta bisa cu e lo ta na Boneiro y Corsou. E pregunta ta di con e no a pasa Aruba, cu tambe ta ricibi diferente tipo di ayudo for di Hulanda, incluyendo Ministerio di Asuntonan Interno ta yudando organisacion local cu voucher pa cuminda na supermercadonan.
Manera por corda, Hulanda a pone codigo oraño pa biahamento pa Aruba debi na e aumento drastico di casonan di coronavirus. Esaki ta nifica cu si e mandatario biaha pa Aruba, automaticamente na su regreso na Hulanda, e lo mester pasa 14 dia den cuarentena. E codigo oraño no ta conta ni pa Corsou ni pa Boneiro.
Segun por a compronde di e relato, e biahe di Knops, encarga cu Asuntonan Interno y Relacionnan di Reino pa e islanan tin un duracion di 4 dia, for di 31 di augustus pa 3 di september. E relato ta bisa: “Gezaghebber, Edison Rijna, lo ricibi Secretario di Estado na Boneiro, caminda e lo hiba combersacion cu miembronan di Colegio Ehecutivo y Conseho Insular, cu e manager di programa di ‘acuerdo di gobernacion ’ y un grupo di ‘young professionals’. Tambe e lo bishita voedselbank, papia cu representantenan di sector priva y Camara di Comercio tocante ayudo di corona. Un bishita na Fundacion Mariadal y Stinapa tambe ta riba programa.
Na Corsou, representante di Hulanda, Erwin Arkenbout, lo ricibi e Secretario di Estado. Tin combersacionnan programa cu Gobernador, Lucille George-Wout y Prome Minister, Eugene Rhuggenaath. E Secretario di Estado lo bishita Cruz Cora y organisacionnan partner den cuadro di e ayudo di corona di Hulanda. Despues e lo haci un recorido den varios bario, caminda e lo papia cu boluntarionan di NGO’s y centronan di bario. Tambe riba e programa tin un reunion cu ‘stakeholders’, representantenan di sector priva y organisacionnan social tocante recuperaciont di economia y maneho.”
