Cu sumo placer parlamentario Alan Howell a ricibi e noticia presenta pa Minister Andin Bikker cu Aruba lo tuma over dos truck special di Royal Schiphol Group N.V. pa Brandweer. E mandatario a haya aprobacion di Conseho di Minister pa tuma dos Airport Crash Tenders over, den cuadro di e cooperacion cu Aruba Airport Authority N.V. tin cu Royal Schiphol Group N.V.
Ta trata aki di trucknan special pa Brandweer por combati candela riba tereno di aeropuerto y lo contribui na duna asistencia adicional pa e proximo añanan. Howell ta aplaudi e determinacion di Minister Bikker cu den e temponan dificil den cual mundo henter ta pasando aden a busca solucionnan cu ta financieramente cargabel pa Aruba toch por haya crash trucknan adicional mientras cu a crea e opcion pa laga haci modificacionan special pa Brandweer por yega na un Service Level Agreement pa mantene e Crash Tenders den condicion optimo.
Finalisando Alan Howell a indica cu e ta spera cu dentro di poco nos por ricibi e trucknan na Aruba y asina fortalece e servicio di Brandweer na aeropuerto.
