Tabata awe den oranan di mainta, un ciudadano a bati alarma pa un persona cu el a mira drenta awa pero no a sali mas. Casi 4 ora despues a haya e curpa.
Un cabayero tabata den bisindario di Boca Catalina ora cu el a haya straño cu un persona cu el a mira baha di su auto drenta lama, a disparce for di bista. Mirando cu el a sinti cu el a tarda demasiado, a dicidi di yama Polis.
Diferente unidad cu a yega na e sitio a dicidi mesora di pidi Polis Maritimo haci un investigacion y tambe Helicopter. Dado momento a mira algo ta drief y a constata cu tabata trata di un persona. Na momento cu a yega cerca, a constata cu e persona no ta duna señal di bida mas y cu tabata trata di un persona di edad.
Na costa, patruyanan a cuminsa haci investigacion riba e pañanan haya y a bin topa cu un cedula cu ta cuadra cu e nomber di e persona riba kende e auto staciona den bisindario ta registra. Tabata trata di un Chevrolet Aveo, registra na un apartamento na Paradera y e doño ta Francisco Jansen di 80 aña. Na october awo e lo mester a cumpli 81 aña.
Polis Maritimo a trece e curpa na waf, pa unda a manda tanto e dokter Texier pa constata morto como familiarnan. Famianan tabata desconsola na e sitio, pasobra Jansen tabata bon. Pero ta sospecha cu na momento cu el a drenta awa, a bira malo y no por a yuda su mes.
Na famianan di e fayecido ta bay palabra di condolencia.