Tur fin di siman Cuerpo Policial di Aruba ta man yen di casonan di chauffeurnan burachi cu ta para nan auto banda di caminda pa pasa wayaba. “No ta asina cu di biaha ta detene nan, pero e ta bay a base di kico”, asina Liliana Rasmijn, Vocero suplente di Cuerpo Policial Aruba a bisa nos awe. Esaki despues cu a nota cu no ta tur hende ta aprecia cu Polis ta detene un persona asina, cu de facto, a tuma e decision corecto di para banda di caminda y evita cu ta sigui stuur siendo burachi, cansa of cu tin soño.
Hopi biaha e persona ta pensa cu drumi banda di caminda e ta sosega y ora bin bij e ta sigui pa su cas. Segun Liliana Rasmijn, ley ta papia di “Openbare dronkenschap”, esta buracheria publico. Mayoria biaha Polis ta detene un persona asina pa buracheria. Hopi biaha ta pidi si hende ta sali y kier dal 2 – 3 drinks, pa por fabor tin un otro hende cu no ta bebe pa hiba Bo cas. Pesey, pa aclaria, drumimento den auto canto di caminda no ta permiti pa ley y asina cu Polis constata cu e persona ta bou influencia, ta deten’e.
Cu un Polis hiba hende su cas na luga di Warda di Polis, ta keda na decision di cada Polis. Tin biaha tin hende cu ta net banda di nan cas y ta gui’e pa yega cas, ley ta bisa cu tin Openbare dronkenschap kiermen no mag ta burachi riba caminda. Den fin di siman autonan ta para band’i caminda, jug den auto, pero esey tampoco ta permiti riba caminda publico.
Tur esaki ta para den ley y Cuerpo Policial di Aruba tin cu actua conforme esey. Cuerpo Policial ta compronde cu tabatin 67 dia di toque de queda y tur hende mester adapta nan mes. Tiki tiki a cuminsa habri luganan y mester tin un poco pasenshi, pasobra tiki tiki ta drenta den e normal nobo. Cosnan no lo ta manera antes mas, asina Liliana Rasmijn a bisa awe.
