Frakshon di PAR ta bastante preokupá, pa loke ta trata diferente kaso di mal maneho den kompania i servisionan gubernamental durante e periodo di 2010 pa 2015.
Na sèptèmber 2017 frakshon di PAR a pidi pa hasi investigashon tokante e benta di e edifisionan di kas di Kòrsou i en parte danki na esaki Pais Kòrsou por a skapa e edifisionan ku un balor di mas ku 4 mion florin.
Resientemente Korte Komun a trata un kaso di froude den ofisina di atmishon (TO), kaminda tin indikashon fuerte di envolvimentu di polítika i eks-ministernan den dunamentu di pèrmit di estadia. Ademas den e temporada di 2010 pa 2015 tin rumornan di mal maneho pa loke ta trata konstrukshon di nos hospital nobo, ku a hiba awe na un petishon di Parlamento pa Kontrolaria General hasi un investigashon riba e proseso di konstrukshon di HNO.
Komo miembronan di Parlamento, frakshon di PAR ta suprayá e seriedat di gobernashon i kumplimentu ku nos reglanan di bon gobernashon. Pa e motibu aki komo frakshon nos no por permití ku no ta hasi nada ku e diferente kasonan aki. Na 2018 Korte Supremo (Hoge Raad ) a destruí e petishon di kasashon den e kaso di mal maneho na Aqualectra, Curoil, RDK i Curgas durante e periodo di aña 2010 pa aña 2012.
Durante e kaso aki, a presentá puntonan di atenshon serio ku mester wòrdu atendé entre otro:
1. Benta di akshonnan di Aqualectra pa fl.1,-. Ku a hiba komo konsekuensia un pèrdida di 62 mion pa e kompania Aqualectra;
- A baha e tarifa di elektrisidat den e periodo di 2010-2012 sin tene kuenta ku e konsekuensianan, kousando asina aki segun e investigashon un pèrdida di 89 mion pa e kompania di Aqualectra.
- Komisariadonan ku a será kontratonan ku kompania i konseheronan sin ku nunka esaki nan a entrega niun produkto. Entre otro zonnepanelen.
- Komisarionan ku a tuma ofer i sinta riba stul di direktornan.
Un punto di preokupashon den e veredikto basa riba Ráport Prof. Mr. J. Willems
ta e echo ku lo tin envolvimentu direkto di polítika den desishon di e 4 kompanianan aki durante e periodo di 2010 pa 2012. Asta ta menshoná eks-ministernan na nòmber den e sentensia di 2016. Ta nesesario pa demostrá na Pais Kòrsou, ku mal maneho i korupshon ta inakseptabel. For di e saku di pan den tienda te na malversashon di miónes, tur ta inakseptabel. Resientemente a presentá otro posibel kaso atrobe di froude den e proseso kiebro di un hotèl. Polítika i polítikonan no por enbolbí nan mes den kompania i servisionan di gobièrnu, esaki ta kontra di tur regla di bon gobernashon.
Frakshon di PAR huntu ku Frakshon di PIN i MAN a pidi un reunion di Komishon Sentral pa deliberá tokante e sentensia di Korte Supremo a base rapòrt Prof. Mr. J. Willems aki, promé ku e reunion aki Frakshon di PAR lo kier kontesta por eskrito di Minister Presidènt Rhuggenaath riba algun pregunta:
- Minister Presidènt Rhuggenaath a tuma nota ku e veredikto di Korte Supremo pa ku e kaso di Ministerio Públiko kontra Aqualectra, Curoil, RDK i Curgas a bira irevokabel?
- Kiko ta posishon di Minister Presidènt Rhuggenaath òf Konseho di Minister komo representante di akshonista riba e veredikto aki?
- Minister Presidènt Rhuggenaath por informá Parlamento kua ta e pasonan ku a tuma pa responsabilisá e kulpabelnan i den kaso ku ta posibel pa eksigí ekspropiashon?
Minister Presidènt Rhuggenaath basa riba e kódigo di Corporate Governance Curaçao, kompanianan den kual pais Kòrsou tin akshon mester atené nan mes na sierto reglanan. Ta na bienestar di e siudadano di Kòrsou pa kada unu mantené su mes na esaki, sin envolvimentu polítiko. I eks mandatarionan, miembronan di komisariado ku no a kumpli ku esaki, mester para responsabel pa nan akshonnan.