E manera cu e ley pa aproba proyectonan den Fondo di Inversion tabata presenta den Parlamento y e actitud di algun minister ta un muestra cla cu gobernacion na Aruba ta den un “dieptepunt.”
E presupuesto di inversion no ta cubri tur e proyectonan
Gobierno a presenta un lista di proyectonan, pero no tin suficiente placa pa paga pa tur. Un gobernante responsabel no por presenta un plan cu un deficit asina na Parlamento.
No tin evaluacion di e proyectonan
Gobierno no por demostra cu un comision di experto a evalua e proyectonan, ni cual criterio tabata uza pa scoge nan. Asina ta laga caminda habri pa traha solamente riba proyectonan pa core campaña politico cu ne en bes di atende cu prioridad di pueblo.
Raad van Advies no a duna conseho riba mas cu mita di e proyectonan
Gobierno a cambia e ley cu a keda presenta na Raad van Advies pa su conseho, di 35 miyon pa mas di 59 miyon. Di e manera aki Raad no por a duna su conseho riba un gran parti di e proyectonan. Un manera robes di traha cu ta debilita e control di Parlamento.
No a hisa e capacidad pa ehecuta e proyectonan
Gobierno a gaba cu inversion y ta crea speransa, pero kico gobierno a haci pa aumenta e capacidad di DOW pa por ehecuta e trabou? Placa riba papel no ta suficiente. Si no tin hende, planificacion y capacidad pa cumpli, e proyectonan por keda para y pueblo ta keda cu e speransa so. Esey no ta bon gobernacion, esey ta crea speransa falso.
Minister kier para riba ley
E cherry riba e bolo di mal gobernacion ta e actitud robes di e Vice-Minister Presidente Gerlien Croes, kende ainda no kier contesta cuanto, na ken y ki dia el a paga pa su biahe di trabou den avion priva. Ta un berguensa cu pa casi un aña cu e mandatario ta cuestiona, ainda e no a contesta na drechi y trece claridad den e caso “Jetlien.” E minister ta lubida cu autoridad grandi ta bin cu responsabilidad y transparencia grandi tambe. Ningun minister ni vice-minister presidente ta para riba ley, pues e minister aki no por keda sin duna cuenta na Pueblo. Mas largo e dura, mas bisto su mal gobernacion ta bira.
Gobernacion den “dieptepunt”
“Locual Pueblo por a mira y scucha durante e debate publico riba e proyectonan di e fondo di inversion, ta djis algun ehempel di e mal gobernacion di Gabinete AVP-FUTURO. Nunca antes Aruba su gobernacion tabata den un “dieptepunt” asina”, parlamentario Maduro ta conclui.
