Parlamentario di AVP, John Hart, a expresa su sosten total pa e Investeringsfonds durante e tratamento den Parlamento. Segun Hart, e aprobacion di e fondo lo habri caminda pa inversionnan importante den bienestar general di Aruba, incluyendo reparacion di careteranan y renobacion di facilidadnan publico.
Hart a destaca cu di e inversionnan, 9 miyon florin lo bay pa asfalta e careteranan. E a menciona cu un analisis a indica cu 355 kilometer di caminda na Aruba tin falta di mantencion, un atraso cu, segun e parlamentario, a pasa di e gabinete Wever-Croes I y II pa e gobierno actual.
Aunque e suma di 9 miyon florin no ta suficiente pa atende tur e necesidadnan, Hart ta considera esaki un bon comienso pa cuminsa recupera e condicion di e infrastructura di Aruba. E ta spera cu, despues di aprobacion di e fondo, e trabounan por cuminsa y e ciudadanonan por mira asfaltado nobo den diferente bario.
“Nos no tin aprobacion ainda, pero mi por bisa cu di parti di nos fraccion tin sosten total pa e Investeringsfonds, pasobra nos ta kere cu ta importante pa nos inverti den nos pais,” Hart a declara.
MFA San Nicolas y MFA Dakota
Otro proyecto cu Hart a destaca ta e renovacion di MFA San Nicolas. Sin embargo, e parlamentario a subraya cu Aruba tin mas necesidad den e area aki, pasobra MFA Dakota tambe mester haya atencion.
Hart a indica cu e siguiente agenda di su fraccion lo inclui pone presion y duna prioridad na e proyecto di MFA Dakota, pa e habitantenan di e zona tambe por beneficia di un facilidad di e tipo aki.
Pa Hart, e inversionnan aki ta representa un señal positivo pa Aruba, no solamente pa mehora infrastructura y facilidadnan publico, sino tambe pa genera actividad economico y un efecto positivo riba economia local.
Presupuesto di DOW tambe ta importante
Durante e entrevista, Hart a haya pregunta tocante na e posibilidad pa DOW haya un presupuesto propio pa atende e condicion di careteranan, tumando na cuenta cu automobilistanan ta paga placa di number.
Hart a contesta cu Parlamento tin tambe e tratamento di presupuesto di pais y di DOW den agenda, y cu e temanan aki lo forma parti di e discusionnan.
Sin embargo, e a enfatisa cu e debate actual ta enfoca riba e proyectonan di inversion y bienestar general pa Aruba. Segun Hart, ora Parlamento aproba e Investeringsfonds, e pais por cuminsa mira un impulso nobo den inversion.
“Mi ta kere cu awe, den e momento cu esaki haya aprobacion, e aire fresco lo bolbe bin Aruba,” Hart a conclui.
