Minister di Husticia, mr. drs. Arthur Dowers, ta rechasa critica di oposicion cu Gobierno no ta invertiendo den Cuerpo Policial Arubano (CPA) y otro departamentonan di Husticia. Segun e mandatario, oposicion ta haciendo politica barata, mientras Gobierno ta ehecutando diferente proyecto di inversion.
Dowers a reacciona riba declaracionnan durante reunion di Parlamento, caminda oposicion a señala cu tin cero inversion pa KPA. Segun e minister, durante periodo cu actual oposicion tabata den Gobierno, nan mes a presenta presupuesto cu cero porciento di inversion pa KPA, KIA, Guarda nos Costa y scol di polis.
El a destaca cu e Gobierno actual a pone un miyon florin disponibel pa renobacion di scol di polis, cu tabata den mal estado. E prome fase ya a realisa y actualmente ta sigui cu di dos fase. Ademas, presupuesto supletorio lo inclui recurso adicional pa continua cu e proyecto.
Dowers a aclaria cu tin diferencia entre presupuesto regular y presupuesto di inversion. Segun dje, cumpra uniform, material di oficina y computer no necesariamente ta forma parti di presupuesto di inversion.
E minister a menciona cu Gobierno tin diferente fondo pa financia proyectonan, incluyendo begrotingsfonds. Relaciona cu KIA, el a señala cu durante aproximadamente shete aña no a realisa inversionnan necesario.
Actualmente Gobierno ta trahando pa mehora e facilidad existente, mientras proceso pa construi un prizon nobo ta continua. Dowers a enfatisa cu Gobierno no por laga KIA deteriora completamente mientras ta spera e prizon nobo.
El a conclui cu critica politico mester ta constructivo y cu Gobierno lo sigui inverti den infrastructura di husticia.
Mas detaye lesa TREMPAN.
