Durante e segundo dia di tratamento di e presupuesto di Algemeen Investerings- en Ontwikkelingsfonds (AIOF) den reunion publico di parlamento, parlamentario di AVP, Clifford Heyliger, a enfatisa cu Aruba mester atende e necesidadnan social y inverti den infrastructura na mesun momento.
Segun Heyliger, e debate no mester presenta e prioridadnan aki como si gobierno mester scoge entre uno of otro. Heyliger a señala cu demasiado biaha e discusion tocante inversion ta reduci na un escogencia entre placa pa funcionamento diario y placa pa proyecto di infrastructura. Den su opinion, un maneho responsabel mester atende ambos, cu planificacion y un distribucion adecua di recursonan.
Presenta esaki como un escogencia obligatorio ta crea un falso dilema cu no ta yuda pais avansa. E parlamentario a menciona sosten p’e pensionadonan, schoolgeld y kindertoelage
como e ehempelnan di inversion den bienestar di pueblo cu mester cana hunto cu inversion den infrastructura. Pa Heyliger, ta necesario pa gobierno por avansa cu varios proyecto y actividad na mesun momento, pasobra e necesidadnan di pais ta existi simultaneamente.
Heyliger a rechasa categoricamente e argumento di oposicion cu gobierno no mester presupuesta of inverti pasobra no tin un garantia di e montante exacto cu lo drenta of
ta gasta. El a califica e argumento aki como absurdo, pasobra un presupuesto ta traha precisamente a base di proyeccionnan di entrada y gasto. E cifranan final no necesariamente ta resulta exactamente manera ta premira.
Segun e parlamentario, si gobierno mester sigui e rasonamento di oposicion, ningun presupuesto lo por ta presenta y ningun inversion lo por avansa te ora cada florin ta garantisa di antemano. E postura aki ta converti un instrumento di planificacion den un excuus pa no tuma accion, mientras pueblo ta sigui warda riba e inversionnan necesario.
Heyliger a enfatisa cu oposicion tin tur derecho pa cuestiona e calculonan, e prioridadnan y e base di un presupuesto. Pero usa e falta di certeza absoluto como argumento pa frena inversion ta desconoce con un presupuesto ta funciona. Ademas, ta un exigencia cu oposicion mes tampoco por a cumpli cu ne durante e periodo cu nan tabata na gobierno.
Pa Heyliger, esaki ta un contradiccion politico evidente: oposicion ta papia di e necesidadnan di pueblo, pero na mesun momento ta presenta un argumento cu, si ta sigui, lo paralisa e accion necesario pa atende e mesun necesidadnan ey. E tarea di gobierno ta pa planifica y actua riba un base responsabel, sin laga cu incertidumbre tocante e cifranan exacto bira un pretexto pa laga pais para.
Durante su intervencion, Heyliger tambe a contesta observacionnan cu un colega di oposicion a dirigi na dje e dia anterior tocante Ecogas y WEB. Heyliger a señala cu no ta un secreto cu e proyecto di biogas no a logra e resultado cu tabata spera. Segun Heyliger, Ecogas no por a produci gas di e calidad cu WEB tabatin mester. Cu esaki, el a aclara e limitacion concreto cu e proyecto a enfrenta.
Heyliger a cuestiona tambe e manera cu oposicion a presenta e maneho di gobierno anterior durante e dos dia di debate. Den un tono critico, el a observa cu e intervencionnan tabata duna e impresion di fantasia robes, cu e gobierno anterior tabata uno perfecto y sin fayo: cu a reduci costo di bida, ehecuta hopi proyecto pa bienestar di pueblo, mantene tur edificio publico y infrastructura, y basha asfalt tur rond di Aruba.
Segun Heyliger, oposicion no por presenta e pasado como si tur cos tabata resolvi, mientras ta cuestiona e inversionnan cu awor ta proponi pa atende necesidadnan di pais. Un debate serio ta exigi cu e mesun medida critico cu ta aplica na gobierno actual, ta aplica tambe n’e maneho anterior. Pa Heyliger, e debate parlamentario mester permiti un evaluacion honesto di loke ta
haci y loke ainda mester ta atendi.
E prioridad ta pa Aruba por avansa cu inversionnan cu ta sostene bienestar di su residentenan y mehora e infrastructura cu pueblo ta uza tur dia. Pueblo tin mester di resultado, y no di e argumentonan politico cu ta laga e necesidadnan sin contesta.
