Den e fin di siman tra’i lomba a reina un ambiente festivo, colorido y yena cu un energia vibrante na Miami, ora cu e celebre Miami Broward Carnival 2026 cu a yega su clausura y a trece hunto miles di amante di cultura Caribense y internacional.
E evento grandi aki a conta cu un asistencia masivo y un participacion impresionante di publico y artistanan cu a pone henter e area baila y gosa di principio te fin. Mark Benson Denz di 24ora.com tabata presenta pa e cobertura.
Di J’ouvert Morning te cu e Gran Parade y concierto
E festividadnan di e fin di siman a cuminsa fuerte diasabra trempan cu e tradicional J’ouvert Morning. Varios trailer cu dj a sa di compaña e diferente participantenan.
Diadomingo tabata e turno di e Gran Parade y e concierto principal, unda e ambiente tabata formidabel. Durante e desfile, por a nota e participacion di no menos di diestres (13) diferente grupo cu a trece un variedad impresionante di truck di zonido, costume colorido y tremendo ritmo di soca.
Despues di e parada a sigui e ‘Bacchanal Sunday’ cu presentacion di diferente dj y banda manera King Kembe, Dj Big Boss, Dj Stakz, Pumpa, Iwer George, TVICE, King James y hopi mas.
Talento di Aruba den Produccion y Maneho di Stage
Un aspecto hopi importante y cu merece mencion special ta e participacion di talento di e islanan, particularmente di Aruba, cu ta trahando duro y hungando un rol clave den e parti tecnico di e produccionnan aki na Miami.
Den e entrevista cu John Baeza, kende ta un di e profesionalnan cu ta labora den e industria aki, el a comparti mas detaye riba su trabou y su responsabilidadnan cu e gran produccionnan di stage y evento na Merca.
Baeza ta encarga cu e coordinacion y supervision di aspectonan crucial manera stage setup, lighting, screens y e maneho tecnico general di e produccionnan na stage. E presencia di profesionalnan manera Baeza ta resalta e talento, e capacidad y e nivel profesional halto cu ta hiba padilanti den e mundo di entretenimento internacional y na Merca, demostrando cu nos hendenan ta destaca den e areanan aki.
Expansion y futuro pa e islanan na Merca
E evento na Miami no solamente tabata un fiesta cultural, pero tambe un plataforma importante pa mustra e talento y e conexionnan fuerte cu e islanan tin den exterior. Banda di e exito na Miami, a resalta cu e trabou di e islanan ta expandiendo tambe pa otro paisnan manera Guyana, unda e desaroyonan economico y cultural ta creciendo rapidamente y ofreciendo mas oportunidad pa intercambionan artistico y comercial.
E cobertura di e evento aki ta sigui mustra con e lasonan cultural y e presencia di e islanan di Caribe ta sigui crece den exterior. E fin di siman di Carnaval na Miami a keda marca como un rotundo exito, y e expectativa ta grandi pa loke ta bini e aña venidero, mientras nos ta keda pendiente pa mas cobertura y reportahe exclusivo for di exterior pa 24ora.com.
