Otmar Oduber a entrega awe, 12 di october, un manifiesto na Parlamento di Aruba den cual e ta reclama igualdad huridico y proteccion legal pa personanan cu ta ocupa un puesto politico. Tur cuater fraccion den Parlamento a acepta e documento den presencia di Presidente di Parlamento, Marlon Sneek.
Cu e manifiesto, e ex-parlamentario y ex-minister ta pidi Parlamento exigi claridad di Gobierno tocante cambionan den Landsverordening instelling ministeries (LIM), cu segun e, un mayoria parlamentario a aproba pa fortifica e proteccion huridico di funcionarionan politico.
Oduber ta sostene cu un politico na Aruba no mester tin menos proteccion legal cu un politico na Hulanda cu ta carga e mesun tipo di responsabilidad publico. E ta presenta e asunto como un cuestion di igualdad y di e posicion di Aruba den Reino Hulandes.
Desde inicio di su manifiesto, Oduber ta enfatisa cu su peticion no ta busca impunidad, inmunidad ni privilegio pa politico. Segun e, tur minister, parlamentario y mandatario mester responde na ley ora tin suficiente motibo pa sospecha cu el a comete un delito. Su preocupacion principal ta concentra riba e manera cu autoridad ta inicia un investigacion penal y e garantianan cu mester existi prome cu esey sosode.
Oduber ta argumenta cu mester tin un distincion cla entre investiga un posibel delito cu tin un base concreto y obhetivo y cuminsa un investigacion cu e speransa di haya algo despues pa hustifica un caso. E ta adverti pa e riesgo di un asina yama fishing expedition: Un investigacion cu ta busca posibel delitonan sin un fundamento suficientemente concreto di antemano.
Segun e autor di e manifiesto, un investigacion prolonga por causa presion politico y personal. P’esey e ta reclama criterianan cla, control y contrapesonan institucional pa e uzo di poder penal di gobierno. Otmar Oduber ta aclaria tambe cu e documento no ta un atake contra Ministerio Publico. E ta reconoce e importancia di combati criminalidad, investiga corupcion y actua contra abuso di recurso publico. Na mes momento, e ta sostene cu e poder di Ministerio Publico mester funciona dentro di limitacionnan legal cla.
Un di e puntonan central di e manifiesto ta e reclamo cu Parlamento mes a tuma un decision pa acerca e proteccion huridico di mandatario politico na Aruba na e garantianan constitucional cu ta existi na Hulanda.
Segun Otmar Oduber, e pregunta awor ta dicon e cambionan cu Parlamento a aproba no a haya implementacion completo. E ta pidi Gobierno splica publicamente si tin obstaculonan huridico, constitucional of di procedimiento y presenta esakinan formalmente na Parlamento.
Den su documento, e ta argumenta cu e falta di claridad no ta afecta solamente politico, sino tambe e autoridad di Parlamento como representante eligi di pueblo.
Oduber ta insisti cu e asunto ta bay mas leu cu su propio persona, un partido of un gobierno. E ta señala cu e reglanan mester ofrece proteccion na tur mandatario politico, tanto esnan di awe como esnan cu lo asumi responsabilidad den futuro.
E ta adverti tambe cu temor pa responsabilidad penal personal por haci ministernan duda pa tuma decisionnan dificil den interes general. Segun Oduber, un cuadro legal cla ta necesario pa nan por cumpli cu nan responsabilidad, mientras nan ta keda responde pa nan actonan dilanti corte.
Entre su peticionnan concreto, Oduber ta pidi Parlamento investiga si e garantianan actual ta suficiente pa evita investigacionnan sin un base obhetivo. Tambe e ta propone un estudio constitucional y huridico independiente pa compara e proteccion di mandatario politico na Aruba y Hulanda, y pa trata e asunto formalmente den Reino.
E recepcion di e manifiesto door di tur cuater fraccion den Parlamento no necesariamente ta indica cu e fraccionnan a aproba su contenido of a asumi un compromiso pa ehecuta e peticionnan.
Oduber ta cera su apelacion cu un reclamo pa Parlamento defende su propio decisionnan y exigi claridad di Gobierno. E mensahe central di su manifiesto ta cu politico mester responde na ley, mientras ley mes mester ofrece proteccion contra uzo arbitrario of desproporciona di poder di gobierno.
