E organisacion di hotel y turismo di nos isla, AHATA, den un carta fecha dia 31 di maart 2023 dirigi na Alfredo Koolman, director di WEB Aruba N.V., ta solicita atencion urgente pa por haya contesta riba nan preguntanan. Nan ta lamenta di a manda varios carta pa WEB, sin cu nan a haya ni sikiera un contesta ni fecha pa reunion. E organisacionnan AHATA, ATIA, CUA, WAB, KVK, FTA, SEPPA, SADA, SIMAR, STT, ABV, OPPA y SPA a uni den un solo carta cu peticion pa reuni dia 3 di maart 2023, pero WEB a opta pa keda den silencio. Y esaki ta precisamente e problema cu e organisacionnan tin cu WEB, esta cu nan no ta transparente!
Di acuerdo cu Tisa LaSorte, presidente y CEO di AHATA, desde cu WEB a instala e mashinnan nobo RECIP IV na juni 2022, cu nan a laga sa di a reduci e uzo di Heavy Fuel Oil (HFO) cu no menos di 25%, cu ta traduci den uzo di mas o menos 800 bari di HFO menos pa dia. Asumiendo un prijs averahe di $70 pa bari di HFO, incluyendo transporte, etc., pues ora uza 800 bari menos pa dia, ta traduci den $56.000,= pa dia! Esey ta nifica ciu WEB ta spaar Afl. 100.240,= pa dia, of Afl. 3.048.967,= pa luna of tambe Afl. 36.587.600,= pa aña.
Di otro banda, AHATA ta cuestiona cu e aumento drastico cu WEB y ELMAR a pone riba pueblo y comercio, balora na mas o menos Afl. 120.000.000,= pa aña. Kiermen, WEB ta haya 120 miyon extra door di e aumento y riba dje a spaar 36 miyon florin ora a cambia ekipo pa produci awa y coriente. E dosnan aki hunto, ta traduci den un bonansa impresionante pa e situacion financiero di WEB.
“Consecuentemente, mester elimina e peso gigante cu a impone riba comunidad door di e aumento di tarifa. Como un compania estatal, WEB mester ta mas transparente cu su situacion financiero y provee e resultado di aña 2022 mas pronto posibel”, asina Tisa LaSorte a skibri. El a copia Anthony Irausquin, Prome Minister Evelyn Wever-Croes, Minister Geoffrey Wever, Minister Glenbert Croes y Ton Rojer di Utilities Aruba N.V.
Loading…
Reload document 
Open in new tab 
