En conexion cu Dia di Hende Muhe, Mary Joan Foundation a tene un clausura y a organisa un charla di ‘Mi kier, Mi por, Mi merece.’ Nan a scoge pa dun’e un tono diferente, mas social, a comparti informacion y entretenimento. A conta cu cuater orador.
Suzy Nadall, vice-presidente di Mary Joan Foundation, a splica cu durante e charla nan tabatin cuater orador presente pa duna informacion, pero tambe testimonio. E oradornan tabata dokter Julian Torres Rivas, radiotherapeut-oncoloog; Ronchi de Cuba, diseñador di moda; Tayrina Arrindell, nurse di Mamma Poli; Magdelyne Laurence cu a duna un testimonio. Tambe a conta cu presencia di Chris Kross pa duna e empuhe na e hendenan muhe relaciona cu e tema di Mary Joan Foundation.
Ainda tin hopi tabu riba cancer di pecho y Nadall ta lamenta esey, pero durante e charla Ronchi de Cuba a papia riba beyesa interno. “Cu bo beyesa ta bo personalidad, pa bo lanta tur dia contento. Tin dia bon, tin dia malo, pero semper keda cu e speransa cu e dia malo ta bay drecha”, Nadall a indica.
Tayrina a duna un splicacion amplio riba e importancia di cuida bo mes. Tambe el a duna tip y conseho con ta funciona na Mamma Poli. Cada bes nan ta purba di drecha y hacie miho posibel, pasobra pa nan e pashent ta importante.
Magdelyne Laurence a duna su testimonio cu a yega e hendenan. Hopi bes ta scucha e cosnan fo’i e dokter- y nursenan. Momento cu un hende papia di tur su procesonan, e ta papia di su curason.
Dokter Torres Rivas ta amigo di cas di Mary Joan Foundation y ta traha na ImSan. Torres Rivas semper ta duna di su banda y a duna tremendo charla.
Pa mas lesa TREMPAN.COM.
