Ku hopi orguyo nos laboratorio nashonal Analytisch Diagnostisch Centrum N.V. (ADC), ta partisipá di a risibí prolongashon di su akreditashon ISO 15189 pa laboratorio médiko for di Raad voor Accreditatie (RvA). Tambe ADC a risibí akreditashon pa su servisionan di laboratorio ku e ta duna na Curaçao Medical Center.
Esaki ta nifiká ku ADC ta kumpli ku tur e normanan moderno di kalidat ku ta konta pa un laboratorio médiko. RvA ta miembro di e European co-operation for Accreditation (EA). Esaki ta duna e akreditashonnan ku ADC a risibí, rekonosementu mundial. Pa pueblo di Kòrsou esaki ta sigur un tremendo notisia, despues ku ADC a kaba di risibí prolongashon di e akreditashon ISO 17025 pa kòntròl di kalidat di awa pa bebe i di awa pa hasi diálisis kuné.
Pa loke ta trata awa, ADC ta kontrolá e aspektonan kímiko i mikro-biológiko den su laboratorio di awa. Pues, ADC ta sigui kumpli ku tur rekisito bálido pa análisisnan di su laboratorio médiko i di su laboratorio di awa. Ku e logronan akí ADC ta sigui demonstrá di ta e laboratorio mas spesialisá na Kòrsou ku ta destaká!
