DJ Edson Tromp tabata un di e caranan mas conoci na Club Visage den decada di 80 y 90. Binticinco aña pasa e tabata un di e DJnan estelar di Visage y te awe ta record’e y ta mar’e na Visage, ora cu menciona su nomber. Tabata hustamente 25 aña pasa un candela a destrui Club Visage y diferente otro negoshi mas den e area.
E candela
E atardi ey Edson tabata trahando como un part timer na Galeria Moderna y segun cu e por a corda, un persona a yam’e bis’e cu Certified ta na candela, sin sa cu Visage tabata den su recta final. Ora cu el a sali bay p’afo den Hendrikstraat, yega na e crusada cu Emanstraat, e por a mira parti pabao con huma preto tabata bay laira. Visage tabata e tempo ey pega cu Certified.
El a spera cu no tabata Visage, pasobra eyden e tin tur su materialnan pa e toca. Tabata un momento di angustia, caminda cu el a busca un lift pa e por a yega mas cerca cu e tabata por. El a yega na e birada di Interbank y pocopoco el a cana banda p’azuid banda di ex Bushiri Hotel. El a mira con Visage tabata kima.
E candela tabata asina fuerte, cu el a cuminsa di patras, bin dilanti. Despues el a drenta Certified y Codemsa, e vlamnan grandi mandando un calor inmenso. El Patio tabatin boter di gas grandi poni pafo di e parkinglot, unda cu ta sinta y come. Despues di un rato a coy e boter di gas y bay cu ne te lama e ora ey, mirando cu e candela a drenta Certified. Por a scucha yen di bleki di fliet ta rementa. Esaki a causa e fin di un era exitoso di e club nocturno mas conoci di Aruba.
Un club nocturno bon y malo
Club Visage tabata un club nocturno bon y malo, segun Edson Tromp. E bon di e tempo ey, ta bay balia y disfruta di e musica, di e DJ y e efectonan di luz cu tabatin. E malo ta cu hendenan mes ta bin cu mal intencion. Pero manera cu bin cu intencion malo, ta saca e persona aki for di Visage. Esey ta e dos aspectonan.
Eyden hende por balia den grupo, como pareha, etc. Semper e pista tabata yen y tur hende ta baila. Hendenan tabata baila disco, merengue, salsa, slow, reague y rock. Ta e variacion cu tabatin den e luga. Esey ta nifica cu e hendenan cu ta sinta na bar, ta esunnan cu ta warda pa e muziek cambia pa nan por subi pista y balia. Tin hopi hende cu ta casa ainda of cu kisas a divorcia, cu a conoce nan pareha e tempo aya bailando slow den Club Visage.
Cu e candela aki, Club Visage a yega na final di un era cu sigur a laga un impacto grandi cerca e Generacion X den e decada di 80 y e prome mita di decada di 90.
