Diabierna awo lo bay tin un Consagracion di Pueblo di Aruba na Sagrado Curason di Hesus y Inmaculata curason di Birgen Maria.
Vicario y pastoor di Parokia di Savaneta, pastoor Andres, a splica cu nos Diosesis ta celebrando 60 aña di existencia y e aniversario aki ta pidi un reflexion riba nos bida. Mundialmente lamentablemente nos a aleha di Dios y Aruba no ta excepcion. Nos ta enfrenta no solamente un bida egoista, materialista, inmoral, division di famia y matrimonio. Tur esey ta hiba na e decision pa yuda pueblo bin bek cerca Dios.
San Pablo den capitulo 12 di romanonan ta bisa “ofrece boso mes como sacrificio agradabel na Dios” y asina ofrece nos mes na Dios pa nos ta nos mes. Sino Dios actua por medio di nos. Esey ta e sentido di consagracion. Loke normalmente kier pa nos tuma tur decision, den e caso aki diariamente pone Dios dilanti, pa e ta autor di nos bida y decisionnan. Pesey tambe diabierna awo, lo bay haci un acto di consagracion. E lo cuminsa riba veld di bala na La Fama na Savaneta sigui pa un santo sacrificio di misa pa 7’or di anochi, unda cu lo tin participacion di tur parokia. Tur parokia di un of otro manera a keda prepara. A bay na cada parokia pa splica kico ta e consagracion y na Savaneta tin un nobena caminda cada un dia un parokia ta participa. Diabierna, e consagracion lo keda haci pa obispo Secco. Tambe lo tin gobernantenan presente, pueblo di Aruba presente. Un invitacion ta bay na un y tur. Den marco di e celebracion aki, lo ofrece simbolicamente e bandera di Aruba pa expresa den santisimo sacramento cu nos kier pa nos mes na pia di dios, den curason di dios. Si despues cada parokia lo bin dilanti cu bela y ofrece su mes simbolicamente na sagrado curason di Hesus y Birgen Maria. Finalmente lo comparti cu pueblo di Aruba y mundo despues, cu un brindis mirando e acontecimento aki.
Diabierna awo, ta cuminsa cu e procesion pa 6’or y pa 7’or e celebracion di Santo Sacrificio di Misa lo tuma luga camnda un y tur ta invita.
