Diaranson mainta a tuma luga un rueda di prensa, caminda cu lider di partido Accion 21, a presenta nan mes y alabes introduci su miembro di mas nobo, kende tabata e parlamentario independiente, Daphne Lejuez.
Miguel Mansur, lider di e partido a comenta cu como partido, nan t’ey pa tur hoben cu ta sinti rechaso na cas, na scol y tambe misa. Un rechaso cu el a biba den carni propio 30 aña pasa.
Loke a cuminsa como un compromiso cu su rumannan LGBT a extende pa un compromiso pa pueblo en general.
Accion 21 ta un partido cu ta existi pa pueblo. Gobierno t’ey pa ehecuta ambicion di pueblo y su deseo.
Durante di e rueda di prensa, a presenta Daphne Lejuez como miembro nobo di e partido. E ta un persona cu a eherce curashi pa pone interes di pueblo prome cu interes di partido. Un persona cu a demostra kico e ta pa traha como parlamentario, teniendo na Aruba na pecho.
Como parlamentario independiente y awo como miembro di partido Accion 21, Lejuez a comenta cu tin hopi hende cu e pregunta dicon el a dicidi pa sigui den politica.
E ta splica cu e fin di siman largo di Pasco Grandi, el a tuma tempo pa discutie den seno familiar y dicidi si realmente e ta sigui den politica. E no tabata su prome escogencia. Pero despues di a sinta cu famia y particularmente cu su yiunan, cu a bisa cu e ta haciendo un bon trabao, e mester sigui y no para.
Esey a yen’e cu hopi emocion y a dicidi cu lo sigui. Tambe, papiando cu Mansur, el a dicidi pa uni Accion 21 y tambe sigur. E vision di e partido ta alinea cu e vision di Lejuez. Tambe, mirando di unda cu Lejuez ta bin, e por visualisa su mes na tur e cambionan cu ainda tin cu tuma luga y ta tempo pa tuma accion.
